စိန်ခေါ်မှုများနှင့် မူးယစ်ဆေးဝါး တိုက်ဖျက်ရေး

မူးယစ်ဆေးဝါးပြဿနာများအား ကိုင်တွယ်ဖြေရှင်းမှုများနှင့် ပတ်သက်၍ ထင်ရှားသည့် ဖိလစ်ပိုင်သမ္မတ ဒူတာတေး မြန်မာနိုင်ငံသို့ လာရောက်သည့် ခရီးစဉ်အတွင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တွေ့ဆုံဆွေးနွေးခဲ့ရာတွင် လူကုန်ကူးမှု တားဆီးရေးနှင့် မူးယစ်ဆေးဝါး တိုက်ဖျက်ရေး၊ အကြမ်းဖက်မှု တိုက်ဖျက်ရေးတို့တွင် ပူးပေါင်းဆောင်ရွက်နိုင်ရန် အပြန်အလှန် ဆွေးနွေးခဲ့ကြောင်း နိုင်ငံတော်အတိုင်ပင်ခံရုံးမှ သတင်း ထုတ်ပြန်ထားသည်။

လူကုန်ကူးမှုပြဿနာများ၊ မူးယစ်ဆေးဝါးနှင့် အကြမ်းဖက်မှုတိုက်ဖျက်ရေး လုပ်ငန်းစဉ်များမှာ မြန်မာနိုင်ငံ ပိုမိုဖွံ့ဖြိုးတိုးတက်ရန် အရေးပါသည့် လုပ်ငန်းစဉ်များ ဖြစ်ပါသည်။  ထိုပြဿနာများထဲမှ မူးယစ်ဆေးဝါး ပြဿနာဆိုလျှင် စိန်ခေါ်မှုများစွာ ရင်ဆိုင်နေရသည့် အနေအထားဟု ဆိုနိုင်ပါသည်။ မြန်မာနိုင်ငံသည် ကမ္ဘာ့မူးယစ်ဆေးဝါး ထုတ်လုပ်မှုတွင် အာဖဂန်နိုင်ငံနောက် ဒုတိယနေရာတွင် ရှိနေပြီး တစ်နိုင်ငံလုံး ဘိန်းစိုက်ပျိုးမှု၏ ရာခိုင်နှုန်း ၉၀ ကျော်သည် ရှမ်းပြည်နယ်တွင် စိုက်ပျိုးနေခြင်းဖြစ်ကြောင်း၊ ရှမ်းပြည်နယ်မြောက်ပိုင်းနှင့် တရုတ်-မြန်မာ နယ်စပ်တို့တွင် ရာဘ ဟုခေါ်သည့် အဖက်တမင်း WY စိတ်ကြွ ဆေးပြားများ အများဆုံး ထွက်ရှိကြောင်းလည်း သိရသည်။ ရှမ်းပြည်နယ်၊ ကချင်ပြည်နယ်၊ ရခိုင်ပြည်နယ် စသည့် အိမ်နီးချင်းနိုင်ငံများနှင့် နယ်နိမိတ် ထိစပ်နေသည့် နယ်စပ်ထွက်ပေါက်နှင့်နီးသော နေရာများတွင် မူးယစ်ဆေးဝါး ဖမ်းဆီးရမိမှု ပိုမိုများပြားနေသည်။ ထို့ပြင် လူဦးရေ ထူထပ်သည့် ရန်ကုန်၊ မန္တလေးကဲ့သို့ မြို့ကြီးများတွင်လည်း ကျပ်ဘီလျံနှင့်ချီသည့်  မူးယစ်ဆေးဝါး ဖမ်းဆီးရမိမှုဖြစ်စဉ်များ ရှိနေသည်။

မူးယစ်ဆေးဝါး အမြောက်အမြား ဖမ်းဆီးရမိသော်လည်း ပိုင်ရှင်မဲ့ဖြစ်နေခြင်းများ ရှိနေချိန်တွင် ပမာဏ အနည်းငယ်မျှသော မူးယစ်ဆေးဝါးများ ဖမ်းဆီးရမိသောကြောင့် ပြစ်ဒဏ်ကျခံရသည့်  ဖြစ်စဉ်များလည်း ရှိနေသည်။ ဥပဒေအရ ကျောသားရင်သား ခွဲခြား၍ မရသောကြောင့် တည်ဆဲဥပဒေအား ဖောက်ဖျက်ကျူးလွန်သူ မည်သူမဆို ဥပဒေအတိုင်း အရေးယူ ခံရနိုင်သည်ကို သတိပြုသင့်ပါသည်။ တစ်ဖက်တွင်လည်း မှန်ကန်မျှတသည့် ဖမ်းဆီးအရေးယူမှု၊ တရားစီရင်မှုများဖြစ်စေရေးမှာလည်း အရေးကြီးနေပါသည်။  မူးယစ်ဆေးဝါး ပြဿနာကြောင့် ဘ၀ပျက်ခဲ့ရသော အသက်အရွယ်များတွင် လူငယ်လူရွယ်များ ပါဝင်နေရာ နိုင်ငံ့အတွက် အရေးပါသော လူသားအရင်းအမြစ်များ နစ်နာဆုံးရှုံးနေရသည်။ ဥပမာဆိုရသော် ရခိုင်ပြည်နယ် ကျောက်ဖြူမြို့နယ် အတွင်းရှိ အထက်တန်းကျောင်းတစ်ခုတွင် ပညာသင်ကြားနေသော အသက် ၁၇ နှစ်အရွယ် န၀မတန်း ကျောင်းသားတစ်ဦး မူးယစ်ဆေးဝါး သုံးစွဲနေသည်ကို တွေ့ရှိ ဖမ်းဆီးခဲ့ရသည့် ဖြစ်စဉ်မျိုးမှာ လူငယ်များအကြား မည်မျှပျံ့နှံ့နေသည်ကို သတိပြုစရာပင်ဖြစ်သည်။ ထို့ပြင်ပြီးခဲ့သည့် ၂၀၁၆ ခုနှစ်အတွင်း မူးယစ်ဆေးဝါး ဖမ်းဆီးရမိမှုများအနက် ရခိုင်ပြည်နယ်အတွင်းရှိ မောင်တော-ဘူးသီးထောင် ကားလမ်းနံဘေးရှိ အုပ်သဲကျောက်ရောင်းဝယ်သည့်နေရာမှ စိတ်ကြွ ဆေးပြားပေါင်း ခြောက်သန်း ဖမ်းဆီးရမိခဲ့သည့် ဖြစ်စဉ်မျိုးမှာ သတိပြုစရာပင်ဖြစ်သည်။ ရခိုင်ပြည်နယ်သည် ဘင်္ဂလာဒေ့ရ်ှနိုင်ငံနှင့် နယ်နိမိတ်ချင်း ထိစပ်နေသည့်အတွက် မူးယစ်ဆေးဝါး ထွက်ပေါက်လမ်းကြောင်းတစ်ခုသဖွယ် ဖြစ်လာပြီး လူငယ်များ၏ အနာဂတ်အတွက် စိုးရိမ်ကြောင်း ဒေသခံများက ထုတ်ဖော်ပြောကြားထားကြသည်။

အထက်ပါ ဖြစ်စဉ်များမှာ မြန်မာနိုင်ငံအတွင်း ပေါ်ပေါက်ခဲ့သော မူးယစ်ဆေးဝါး ပြဿနာများအနက်မှ အချို့သာလျှင်ဖြစ်သည်။ မူးယစ်ဆေးဝါး ပြဿနာနှင့် ပတ်သက်၍ ပိုမိုစိုးရိမ်လာကြပြီး အနာဂတ်မျိုးဆက်များအား မူးယစ်ဆေးဝါးအန္တရာယ်မှ ကင်းဝေးစေလိုနေကြသည်။  နိုင်ငံ့အနာဂတ်အတွက် အားထားစရာ လူသားရင်းမြစ်များအား ဖျက်ဆီးနေသည့် မူးယစ်ဆေးဝါး ပြဿနာအား တရားဥပဒေစိုးမိုးမှုနှင့်အတူ မှန်မှန်ကန်ကန် တိုက်ဖျက်နိုင်ရေးအတွက် လိုလားနေကြပါကြောင်း The Daily Eleven သတင်းစာက ရေးသားအပ်ပါသည်။

 

(မတ်လ ၂၁ ရက်နေ့ထုတ် The Daily Eleven သတင်းစာ၏ အယ်ဒီတာ့ အာဘော်)