လိင်ပိုင်းဆိုင်ရာ ကိုယ်ထိလောက်ရောက် ကျူးလွန်မှုအတွက် ရေဒီယိုဒီဂျေဟောင်း ဒေးဗစ်မက်လာကို တရားစွဲဆိုမှုတွင် အနိုင်ရရှိခဲ့ပြီးနောက် အဆိုတော်တေလာဆွစ်သည် သြဂုတ် ၁၄ ရက်တွင် အောင်ပွဲခံခဲ့သည်။

၂၀၁၃ ခုနှစ်တွင် ဒန်ဗားမြို့ရှိ ပက်စီစင်တာ၌ ဖျော်ဖြေပွဲမစမီ ဇာတ်စင်နောက်တွင် ဓာတ်ပုံရိုက်စဉ်အတွင်း ဆွစ်၏ တင်ပါးကို လှမ်းကိုင်ခဲ့သည်ဆိုသော တရားစွဲဆိုမှုတွင် ရေဒီယိုဒီဂျေဟောင်း ဒေးဗစ်မက်လာသည် အပြစ်ရှိသည်ဟု တရားသူကြီးက စစ်ဆေးတွေ့ရှိခဲ့သည်။

ဆွစ်၏ ကိုယ်ရံတော်ဟောင်းတစ်ဦးကလည်း ဒီဂျေမက်လာသည် ဆွစ်၏စကတ်အောက်မှ လက်ထည့်ပြီး လိင်ပိုင်းဆိုင်ရာ ကိုယ်ထိလက်ရောက် ကျူးလွန်ခဲ့သည်ဟု သြဂုတ် ၁၁ ရက် ကြားနာစစ်ဆေးမှုတွင် သက်သေထွက်ဆိုခဲ့သည်။

ဆွစ်သည် ၎င်းတောင်းဆိုခဲ့သည့် အမည်ခံနစ်နာကြေး တစ်ဒေါ်လာကိုလည်း ရရှိခဲ့သည်။ အသက် ၂၇ နှစ်အရွယ်ရှိ တေလာဆွစ်က တရားရုံးကို ကျေးဇူးတင်ကြောင်း ၎င်းနှင့်လိင်ပိုင်းဆိုင်ရာ ကိုယ်ထိလက်ရောက် ကျူးလွန်ခံရမှုအတွက် နှုတ်ဆိတ်ခဲ့သူ မည်သူမဆိုအတွက် တိုက်ပွဲဝင်ပေးခဲ့သည့် တရားရေးအဖွဲ့ကို အသိအမှတ်ပြုကြောင်း ကြေညာချက် ထုတ်ပြန်ခဲ့သည်။

“ကျွန်မရဲ့ မျှော်လင့်ချက်က လိင်ပိုင်းဆိုင်ရာ ကိုယ်ထိလက်ရောက် စော်ကားခံရတဲ့သူတွေရဲ့ အသံတွေကို ကြားသိဖို့အတွက် ကူညီဖို့ပါ။ ဒါကြောင့် လိင်ပိုင်းဆိုင်ရာ စော်ကားခံရတဲ့သူတွေကို အကူအညီပေးတဲ့ အဖွဲ့အစည်းတွေကို အနာဂတ်မှာ လှူဒါန်းသွားမှာပါ” ဟု ဆွစ်က ပြောကြားခဲ့သည်။

မက်လာသည် ယင်းဖြစ်စဉ်ဖြစ်ပွားခဲ့ပြီးနောက် KYGO ရေဒီယိုဌာနမှ အလုပ်ဖြုတ်ခံခဲ့ရသည်။ ယင်းအတွက် မက်လာက ဆွစ်ကြောင့် အလုပ်ပြုတ်ခဲ့ရသည်ဟုဆိုကာ ၂၀၁၅ ခုနှစ် စက်တင်ဘာတွင် အမှုဖွင့်ခဲ့ပြီး နစ်နာကြေး ဒေါ်လာ သုံးသန်း တောင်းဆိုခဲ့သည်။ တေလာဆွစ်သည် ရဲကိုခေါ်ရမည့်အစား မန်နေဂျာများကို ခေါ်ဆိုခဲ့သည့်အတွက် ၎င်း၏ အလုပ်အကိုင်နှင့် လစာဆုံးရှုံးခဲ့ရသည်ဟု မက်လာက ဆိုသည်။ ဆွစ်၏ လက်ထောက်များသည် ရေဒီယိုဌာနကို ဖုန်းဆက်ပြီး ၎င်းကို အလုပ်ဖြုတ်ရန် တောင်းဆိုခဲ့သည်ဟု မက်လာက စွပ်စွဲခဲ့သည်ဟု တရားရုံးမှတ်တမ်းများတွင် ဖော်ပြခဲ့သည်။ ဆွစ်ကလည်း လိင်ပိုင်းဆိုင်ရာ ကိုယ်ထိလက်ရောက် ကျူးလွန်မှုဖြင့် မက်လာတိုပြန်လည် တရားစွဲခဲ့သည်။