ဘ၀တိုးတက်မှု အခွင့်အလမ်းအတွက် နိုင်ငံရပ်ခြားသို့ မြန်မာလူငယ်များ ပညာသင်သွားရောက်ကြရာတွင် မိမိတို့သဘောဆန္ဒအလျောက် သွားရောက်ခြင်းအပြင် မိဘများမှစေခိုင်းသည့် အချက်များလည်း ပါဝင်နေပါသည်။

    ထို့အပြင် လူငယ်များ အချင်းချင်းအကြားတွင် မိမိတို့မွေးရပ်မြေများနှင့် ကင်းကွာရာသို့ ထွက်ပေါက်တစ်ခုသဖွယ် စတင်ယူဆလာကြကာ အများစုမှာ နိုင်ငံရပ်ခြားတွင် ပညာသင်လိုခြင်း၊ အလုပ်လုပ်ကိုင်လိုခြင်း စသည့်အချက်များ က နိုင်ငံရပ်ခြားတွင် ပညာသင်ခြင်းကို အစပြုလာစေခြင်း ဖြစ်ပါသည်။

    ယင်းကဲ့သို့ အစပြုလာခဲ့ရာမှ နိုင်ငံရပ်ခြားသွားပညာသင်၊ အလုပ်လုပ်ကိုင်ခြင်းများသည် ဆယ်စုနှစ်တစ်ခု ကျော်ကြာလာသည့်တိုင် ရေပန်းစားနေဆဲ ဖြစ်ပါသည်။ ယခင်အချိန်များက နိုင်ငံရပ်ခြားသို့ ပညာသင်သွားရောက်ရာ တွင် ပညာရေးအေဂျင်စီများ၏ ဆွဲဆောင်မှုတစ်ခုတည်းကိုသာ ရွေးချယ်လေ့ရှိသော်လည်း ယနေ့အချိန်တွင်မူ ပညာရေးအေဂျင်စီများ၏ ဆွဲဆောင်မှုတစ်ခုတည်းကိုသာ လက်ခံပြီး ရွေးချယ်ပါက နစ်နာမည်ဖြစ်ကြောင်း နိုင်ငံတကာတွင် ရောက်ရှိနေသော မြန်မာလူငယ်များနှင့် နိုင်ငံတကာ ပညာရေးအတိုင်ပင်ခံများက ပြောဆိုကြသည်။

    အထူးသဖြင့် သွားရောက်မည့် နိုင်ငံ၊ ကုန်ကျနိုင်မည့် ကုန်ကျစရိတ်၊ လက်တွေ့ အကျိုးဖြစ်ထွန်းနိုင်မှု ရှိ၊ မရှိနှင့် ရွေးချယ်မှု မမှားယွင်းစေရန် အတွက် လေ့လာမှုဆန်းစစ်မှုများကို ပညာသင် သွားရောက်ကြမည့် လူငယ် များသာမကဘဲ မိဘများကပါ သေချာဆန်းစစ်ပြီးမှ ရွေးချယ်ကြရန် လိုအပ်လာကြောင်း သိရပါသည်။

မည်သည့်တက္ကသိုလ်မှ အလုပ်ရရန် အာမခံချက်မပေး

    ယနေ့ခေတ်၌ နိုင်ငံရပ်ခြားရှိ တက္ကသိုလ်အသီးသီးမှ မြန်မာကျောင်းသား လူငယ်များအား နိုင်ငံတကာ ပညာသင်ဈေးကွက်တစ်ခု ဖန်တီးကာ မက်လုံးအမျိုးမျိုးဖြင့် ဈေးကွက်ရှာဖွေမှုများ ရှိလာခဲ့ကြသည်။

    တစ်ဖက်တွင်လည်း ပညာသင် သွားရောက်ရာမှ အလုပ်လုပ်ကိုင်ပြီး သွားရောက်သည့်နိုင်ငံ၌ပါ နေထိုင်ရန် အခွင့်အလမ်းကို မြန်မာလူငယ် အများစုက မျှော်လင့်ထားလျက် ရှိကြပါသည်။

    သို့ရာတွင် နိုင်ငံတကာတက္ကသိုလ် အသီးသီးမှ ဈေးကွက်တာဝန်ခံ အများစုက' ကျောင်းပြီးသည့်အခါ မိမိနေရပ်နိုင်ငံသို့ ပြန်လာ၍ လမ်းသစ်တစ်ခုဖောက်ရန်နှင့် ရောက်ရှိရာ နိုင်ငံ၌ လူမျိုးကွဲပြားသည့် သူများနှင့် ပေါင်းသင်းလက်ထပ်ခြင်းကို တတ်နိုင်သမျှ ရှောင်ကြဉ်သင့်သည်'ဟု ဆွေးနွေးပွဲများတွင် သတိပေးပြော ကြားလေ့ရှိကြသည်။

    ထို့အပြင် တက္ကသိုလ်တက်ရောက်ပြီး ဘွဲ့(သို့မဟုတ်)ဒီပလိုမာ ရရှိထားရုံမျှဖြင့် အလုပ်အကိုင်ရရှိရန် အပြည့်အ၀မျှော်လင့်၍ မရနိုင်ကြောင်းကိုလည်း ထည့်သွင်းပြောဆိုကြပါသည်။ ပညာသင်ကြားခြင်းသည် လမ်းပေါ်သို့ရောက်ရှိရန် တွန်းတင်ပေးလိုက်ခြင်းသာဖြစ်ပြီး လမ်းထက်၌ဆက်လျှောက်ရန်မှာ ကျောင်းသား၏အားထုတ်မှုသာ ဖြစ်ကြောင်းလည်း ပြောဆိုကြပါသည်။
    ပညာသင်ကြားရန် မြန်မာလူငယ် အများဆုံးရောက်ရှိနေသည့် စင်ကာပူနိုင်ငံမှ ပညာရေးဈေးကွက် တာဝန်ခံများကလည်း မည်သည့် အကြောင်းကြောင့်ဖြစ်စေ ကျောင်းပြီးပါက အလုပ်အကိုင်ရရှိရန် အာမခံပေးမည် မဟုတ်ကြောင်း ပြောဆိုထားကြပါသည်။

    စင်ကာပူရှိ STET Institute မှ Ms.Linda စင်ကာပူမှာကျောင်းပြီးလို့ အလုပ်အကိုင်ရဖို့အတွက် အာမမခံပါဘူး။ အလုပ်ရဖို့ဆိုတာ ကိုယ့်အရည်အချင်းနဲ့သာ ဆိုင်တာပါ။ ကိုယ်က အရည်ချင်းပြည့်ဝရင် အလုပ် အကိုင်ကောင်းတွေ ရပါလိမ့်မယ်' ဟု ပြောကြားခဲ့ပါသည်။

ပညာရေး အေဂျင်စီများ၏ ဈေးကွက်ချဲ့ထွင်မှုနှင့် သတိထားဖွယ်ရာများ

    နိုင်ငံတကာပညာရေး အေးဂျင်စီများမှ တရားဝင်ကုမ္ပဏီ ထူထောင်ပြီး ဈေးကွက်ရှာဖွေလာကြသည့် အတွက် ယခင်ကကဲ့သို့ အေးဂျင့်များမှ ငွေလိမ်လည်ခြင်းရှိမည်ကို မစိုးရိမ်ရသည့် အခြေအနေ ရှိလာခဲ့ကြောင်း ယခင်က ယေဘုယျအားဖြင့် လက်ခံထားကြပါသည်။

    သို့သော် ပညာရေးအေဂျင်စီ တစ်ခုချင်းစီက ကျောင်းသားလူငယ်များအား မိမိတို့ရရှိထားသည့် သက်ဆိုင်ရာနိုင်ငံများရှိ တက္ကသိုလ်များသို့သာ စည်းရုံး တက်ရောက်စေခြင်းသည်လည်း ဦးတည်ချက်လွဲမှားစေ သည့်ဖြစ်စဉ်များရှိလာခဲ့သည်။

    'ကျွန်တော့်သားရဲ့ အခြေခံပညာ အထက်တန်း အောင်မှတ်က ၃၀၀ ကျော်ပဲရှိတယ်ဗျာ။ သူက ဆေးပညာနဲ့ဆိုင်တဲ့ ဘာသာရပ်တစ်ခုကို သင်ကြားချင်တယ်။ မဖြစ်နိုင်ဘူးဆိုတဲ့ အခြေအနေမှာ ပြည်ပ ပညာရေးအေဂျင်စီ တစ်ခုနဲ့ ဆက်သွယ်မိတယ်။ ကျွန်တော့်သားဖြစ် ချင်တာကို သူတို့ကဖြစ်အောင် လုပ် ပေးနိုင်တယ်။ အင်္ဂလန်မှာ သူတို့နဲ့ ချိတ်ဆက်ထားတဲ့ကျောင်းရှိတယ်။ ကျောင်းတက်ပြီးရင် ဆေးပညာနဲ့ ဆိုင်တဲ့ ဘွဲ့တစ်ခုခုရမယ်။ ငွေတော့ အကုန်အကျများမယ်လို့ ဆိုပြီးပြောလာတယ်။ သူတို့ပြောတဲ့အတိုင်းဆို ငွေက သိန်းထောင်ဂဏန်းလောက် ပေးရမှာ။ ကျွန်တော့်သား ရထားတဲ့ အမှတ်က ဆေးပညာနဲ့ဆိုင်တဲ့ ဘွဲ့တစ်ခုခုရဖို့ ခက်ခဲတယ်။ ဒါပေမယ့် သူတို့ကလည်း ဖြစ်နိုင်တယ်ဆိုပြီး ပြောလာတော့ စိတ်ဝင်စားမိတယ်။ ဒီအကြောင်းကို မိတ်ဆွေတွေကိုပြောကြည့်တော့ မဖြစ်နိုင်တာ တွေ့လာတယ်။ နိုင်ငံခြားကိုဆက် စုံစမ်းကြည့်လိုက်တော့ သူတို့ပြောတဲ့အစီအစဉ် ရှိတာတော့ ဟုတ်တယ်။ ဒါပေမယ့် ၀င်ခွင့်အရင်ဖြေရတယ်။ ၀င်ခွင့် မအောင်ရင်  ဆက်တက်လို့ မရတော့ဘူး။ သူတို့က အဲဒီအပိုင်းကို မပြောထားဘဲ ဟိုရောက်အောင် တာဝန်ယူမယ်၊ ငွေကို ဒီကထွက်ကတည်းက အကုန်ပေးသွားရဖို့ပဲ ပြောတယ်။ နောက်ပိုင်း ထပ်သိလာတဲ့ အခြေအနေတွေအရ မဖြစ်နိုင်ဘူးဆိုတာ သိတဲ့အတွက် သူတို့ အစီအစဉ်အတိုင်း မလုပ်ဖို့ လက်လျှော့လိုက်တယ်'ဟု မိဘတစ်ဦးက ပြောပြပါသည်။

    ပြည်တွင်း ပညာရေးဈေးကွက် အတွင်း ပြည်ပနိုင်ငံများသို့ ပညာသင်သွားရောက်လိုသော လူငယ်များအတွက် ပညာရေးအေဂျင်စီအရေ အတွက်မှာ များပြားလျက်ရှိနေပြီး ပုံစံမျိုးစုံဖြင့်လည်း ဈေးကွက်ရှာ ဆွဲဆောင်မှုများ ပြုလုပ်လျက်ရှိကြောင်း သိရသည်။

    'အခုချိန်မှာ ဆိုးလာတာက ပညာရေးအေဂျင်စီအများစုက အကြံပေးအဖြစ်ကနေ စီးပွားရေးဆန်လာကြပြီး စီးပွားဖြစ်ဖို့ တစ်ခုကိုပဲ ကြည့်ပြီး လုပ်ကိုင်လာကြတာတွေ ရှိနေတယ်။ တခြားသူတွေအတွက် ထည့်သွင်း စာနာတာမျိုး၊ ဖြစ်သင့်ဖြစ်ထိုက်တာတွေကို အကြံပေးတာမျိုးတွေ မရှိတော့ဘူး။ ဒီအခါမှာ နိုင်ငံခြားသွားမယ့် ကျောင်းသားတွေရော၊ မိဘတွေကပါ လေ့လာမထားရင် ဆိုးဝါးတဲ့ကိစ္စတွေ ဖြစ်လာနိုင်စရာရှိနေတယ်'ဟု ပညာရေး အတိုင်ပင်ခံတစ်ဦးကလည်း ပြောပြပါသည်။

    လက်ရှိအချိန်တွင် စင်ကာပူနိုင်ငံသို့ နှစ်စဉ် မြန်မာဦးရေ အနည်းဆုံး ၂၀၀၀ နှင့်အထက်သည် ပညာရေးကိစ္စရပ်များကို အကြောင်းပြုပြီး ထွက်ခွာလျက်ရှိကြောင်း စုံစမ်းသိရှိရသည်။

    'အရင်နှစ်တွေတုန်းက နိုင်ငံရပ်ခြားကို Student Pass နဲ့အထွက်ပြပြီး ဟိုမှာ အလုပ်လုပ်ကြတယ်။ အဲလိုလုပ်ဖို့ အဓိကဦးတည်ပြီးသွားသူ တချို့ဆိုရင်မရှိရှိတာနဲ့ ပေါင်နှံရောင်းချပြီး နိုင်ငံခြားကိုထွက်ကြတယ်။ ဟို မှာတစ်ဦးတစ်ယောက် အလုပ်အကိုင် ကောင်းတိုင်း ကိုယ်ကကောင်းမယ် ထင်ကြတယ်။ ဟိုမှာလည်း မြန်မာ ကျောင်းသားတွေ ကိုယ့်ကိုယ်ကိုယ် survive ဖြစ်ဖို့ အတော်လေး ရုန်းကန်ကြရပါတယ်။ အဲဒါကို သေချာ မစစ်ဆေး၊ မမေးမြန်းဘဲသွားတဲ့အခါ မှာ ဒုက္ခတွေရောက်ကြတယ်။ ဒီလို ကြုံတွေ့ရတာက စင်ကာပူမှ မဟုတ်ပါဘူး။ ဘယ်နိုင်ငံမဆိုပါ'ဟု နိုင်ငံတကာရေးရာ ကျွမ်းကျင်သူတစ်ဦး က ပြောပြခဲ့သည်။

    မြန်မာလူငယ်အများစု ပညာသင် သွားရောက်သည့်နိုင်ငံမှာ စင်ကာပူ၊ မလေးရှား၊ ထိုင်း၊ အမေရိကန်၊ အင်္ဂလန်နိုင်ငံ၊ သြစတြေးလျ နိုင်ငံများ ဖြစ်ကြကာ စင်ကာပူ၊ မလေးရှားမှာ မြန်မာကျောင်းသား အများစုသွားရောက်သော နိုင်ငံတကာ ပညာသင်နိုင်ငံများ ဖြစ်ကြသည်။

    စင်ကာပူအစိုးရ ကျောင်းများဖြစ်သော ပေါ်လီ အပါအ၀င်အခြားသော အစိုးရကျောင်းများမှ ဘွဲ့ရပြီးပါက စင်ကာပူ၏ အမြဲတမ်းနေထိုင်ခွင့် (ပီအာ) ရရှိကြမည် ဖြစ်သော်လည်း ယခုအခါ စင်ကာပူ၌ ၎င်းတို့ နိုင်ငံသား၊ ပီအာ၊ နိုင်ငံခြားသားများ၏ အခွင့်အရေးနှင့် တန်းတူခံစားခွင့်များအား ၂၀၀၉ နှစ်ကုန်ပိုင်းမှ စတင်ကာ သိသာစွာ လျှော့ချခဲ့ရာ မြန်မာကျောင်းသားများ၏ ပီအာဖြစ်နိုင်ခွင့်မှာ အကန့်အသတ်များစွာ ရှိခဲ့သည်ဟု စင်ကာပူရောက်မြန်မာ လူငယ်တစ်ဦးက ပြောပြခဲ့သည်။

    မြန်မာကျောင်းသား ဒုတိယ စိတ်ဝင်စားမှုများသော မလေးရှား၌ ပညာသင်ရန် ဆုံးဖြတ်သည်မှာ အခြားနိုင်ငံကြီးတစ်ခုခုသို့ ကူးပြောင်းလို၍ သို့မဟုတ် မလေးရှားမှ တစ်ဆင့် စင်ကာပူသို့ ပြန်လည်အခြေချ လုပ်ကိုင်လို၍ ဖြစ်ကြသည်ဟု မလေးရှားပညာရေး ၀န်ဆောင်မှုလုပ်ငန်း အချို့က ဆိုသည်။

    အင်္ဂလန်နိုင်ငံသို့ ၂၀၀၉ နှစ် လယ်ပိုင်းမှ စတင်ကာ မြန်မာလူငယ်များ သွားရောက်မှုများခဲ့ကာ အများစုမှာ အမှန်တကယ် ကျောင်းတက်ရောက်လိုခြင်းထက် အလုပ်အကိုင် ရရှိရန်သာ ဦးတည်ခဲ့ခြင်းကြောင့်  အဆင်မပြေမှုများ ရှိခဲ့ကြောင်း သိရသည်။ အကြောင်းရင်းများထဲတွင် ပညာရေးအေဂျင်စီအချို့၏ ဈေးကွက်ရရန် အဓိကဦးတည်ခဲ့ခြင်းတို့ကြောင့် အဆင်မပြေမှုများနှင့် ကြုံတွေ့ခဲ့ရကြောင်း အင်္ဂလန်နိုင်ငံရောက် မြန်မာကျောင်းသားအချို့က ပြန်လည်ပြောပြခဲ့သည်။

      ထို့ပြင် သြစတြေးလျနိုင်ငံသည်လည်း မြန်မာကျောင်းသားအများစု၏ ဈေးကွက်ရရှိရန် ယနေ့အချိန်တွင် ဦးတည်နေရာ မြန်မာလူငယ်အများစု ရောက်ရှိသင်ကြားနေကြသည့် ဘာသာရပ်မှာ အင်ဂျင်နီယာဖြစ်ကာ ငွေ ကြေးထောက်ပံ့မှု အပြည့်အ၀ပေးနိုင်သည့် မိဘများ၏သားသမီးများသာ တက်ရောက်နိုင်မှု များပြားကြသည်။ သို့သော် မည်သို့ပင် ထောက်ပံ့နိုင်သည်ဖြစ်စေ အချိန်ပိုင်းအလုပ်လုပ်ကိုင်မှသာ အဆင်ပြေကြောင်းနှင့် အများစု အဆိုပါ နိုင်ငံသို့သွားလိုသည့် ရည်ရွယ်ချက်မှာ အမြဲတမ်းနေထိုင်ခွင့် (PR) ရရှိရန် ရည်ရွယ်ခြင်းဖြစ်ကြောင်း သိရသည်။

    ယခုအခါ အမေရိကန်နိုင်ငံမှ အမှန်တကယ် ထူးချွန်သူများအား စကောလားရှစ်အစီအစဉ်များ၊ အစိုးရ ၏ထောက်ပံ့မှုအပြင် ပြင်ပပုဂ္ဂလိက အဖွဲ့အစည်းများ၏ ထောက်ပံ့မှုများ ဖြင့် စကောလားရှစ်အစီအစဉ်များ အား အွန်လိုင်း၊ ပညာရေးဝန်ဆောင်မှုများဖြင့် ရှာဖွေသွားရောက်နိုင်ကြသည်ဟု သိရသည်။

    ထို့ပြင် ဒေသတွင်းနိုင်ငံများ ထဲမှ အင်ဒိုနီးရှားနှင့် ဖိလစ်ပိုင်နိုင်ငံမှ တက္ကသိုလ်များသည်လည်း မြန်မာဈေးကွက်သို့ ရောက်ရှိလာခဲ့သည်။

    သို့သော် မြန်မာလူငယ်များ၏ စိတ်ဝင်စားမှုသည် စင်ကာပူနှင့် မလေးရှားနိုင်ငံတို့ထက် ကျော်လွန်မှု မရှိခဲ့ကြောင်းလည်း သိရှိရသည်။ မြန်မာလူငယ်များ ယနေ့တိုင် စိတ်ဝင်စားသည့် ဂျပန်နိုင်ငံရှိ တက္က သိုလ်များမှာ ကျောင်းလခစရိတ်များပြားကာ ယင်းနိုင်ငံရှိ တက္ကသိုလ်များသို့ တက်ရောက်နိုင်ရန် ဂျပန်ဘာသာ စကားကျွမ်းကျင်မှုအဆင့် Level ၃ အနိမ့်ဆုံးရှိထားမှသာ ၀င်ခွင့်ရရှိနိုင်သည်ဟု သိရသည်။

လေ့လာပြင်ဆင်ပြီးမှ ထွက်ခွာခြင်းသာ အမှားကင်းမည်

    မည်သို့ပင်ဖြစ်စေ မိခင်နိုင်ငံမှ ထွက်ခွာကာ နိုင်ငံအသီးသီးသို့ ပညာသင်သွားသူများ၏ ရည်ရွယ်ချက်သည် နိုင်ငံတကာနှင့်တန်းတူ မိမိ အရည်အချင်း မြှင့်တင်လိုခြင်း၊ အလုပ်အကိုင်ကောင်းတစ်ခု ရရှိလိုခြင်း အပြင် မိခင်နိုင်ငံတွင်းရှိ လိုအပ်နေသည့် နိုင်ငံရပ်ခြားအတွေ့အကြုံ ရရှိလိုခြင်းများကိုသာ စိတ်အားထက်သန်လျက် ရှိနေကြပါသည်။

    မည်သည့်နိုင်ငံသို့ မည်သည့်အကြောင်းကြောင့်ဖြင့် ပညာသင်၊ အလုပ်လုပ်ကိုင်သည်ဖြစ်စေ မိမိအရည်အချင်းကို ဦးစွာမြှင့်တင်ထားရန်နှင့် ပညာသင်ယူမည်ဆိုပါက ငွေကြေး လုံလောက်မှု အတိုင်းအတာ ရှိ၊ မရှိ ကို ချင့်ချိန်တွက်ချက်ပြီးမှ သွားလာသင့်သည့်အပြင် ပြည်ပပညာရေး ၀န်ဆောင်မှုအေးဂျင့်များ၏ ပြောစကားများအား ယုံကြည်ခြင်းထက် မိမိကိုယ်တိုင်တက္ကသိုလ်၊ ဒီဂရီ ကောလိပ်များ၏ မူရင်းဝက်ဘ်ဆိုက်၊ အီးမေးလ်များ အား စုံစမ်းမေးမြန်းမှု ပြုလုပ်ခြင်း၊ ပြင်ပလူမှုအဖွဲ့အစည်းများ၌ ပါဝင်ခြင်း၊ သက်ဆိုင်ရာနိုင်ငံ အသီးသီး၏ ပညာရေးအဖွဲ့အစည်းများမှ သတင်းအချက်အလက်များအား သံရုံးဝက်ဘ်ဆိုက်များမှတစ်ဆင့် သတင်းအချက်အလက် အမှန်များ ရယူခြင်းများဖြင့် ဦးစွာပြုလုပ်ပြီးမှ သွားလာသင့်သည်ဟုလည်း အတွေ့အကြုံရှိသူများက သုံးသပ်ကြပါသည်။