ဒီဇင်ဘာ ၄ ရက်က နယူးယောက်တွင် ဆီရာယာလီယွန်၏ ငြိမ်းချမ်းရေးစိန်ကြီးအား ပြသထားစဉ်

ဆီရာယာလီယွန်အစိုးရက ရာဇဝတ်မှုများထူပြောသည့် စိန်ရောင်းဝယ်မှုကိုဟန့်တားရန် ရည်ရွယ်ချက်ဖြင့် ရောင်းချလိုက်သည့် ‘ငြိမ်းချမ်းရေးစိန်’ ဟုခေါ်ဆိုကြသော အလွန်ကြီးမားသည့်စိန်ကြီးသည် ဒီဇင်ဘာ ၄ ရက်က ဒေါ်လာ ၆ ဒသမ ၅ သန်းဖြင့် ရောင်းချခဲ့ရသည်ဟု သိရသည်။

မတ်လက တူးဖော်တွေ့ရှိခဲ့သည့် ၇၀၉ ကာရက်ရှိသည့် ထိုစိန်ကြီးသည် ဆီရာယာလီယွန်တွင် ရာစုနှစ်ဝက်ကာလအတွင်း တွေ့ရှိခဲ့သည့် အကြီးဆုံးစိန်ကြီးဖြစ်ခဲ့သည်။ ထို့ပြင်ကျွမ်းကျင်သူတို့၏ ပြောကြားချက်အရ ယင်းစိန်သည် ကမ္ဘာတစ်ဝန်းတွင် တွေ့ရှိခဲ့သည့် အကြီးဆုံးစိန်များအနက် အဆင့် ၁၀ နှင့် ၁၅ ကြားတွင်ရှိနိုင်ကြောင်း သိရသည်။

ဧဝံဂေလိသင်းအုပ်ဆရာမိုမိုးက ဦးဆောင်သည့် ကုမ္ပဏီတစ်ခုမှ အဆိုပါစိန်ကို ရှာဖွေတွေ့ရှိခဲ့ခြင်းဖြစ်သည်။ အစိုးရက ဆီရာယာလီယွန်အတွက် ဖွံ့ဖြိုးမှုအလားအလာများ၊ အကျိုးအမြတ်များ ပိုမိုကျန်ရစ်အောင် ရောင်းချနိုင်လိမ့်မည်ဆိုသော မျှော်လင့်ချက်ဖြင့် ယင်းကုမ္ပဏီက ထိုစိန်အားအစိုးရထံပေးခဲ့သည်။ ဗြိတိန်ကျောက်မျက်ရတနာကုန်သည် လောရင့်ဂရက်ဖ်က ထိုစိန်ကိုဝယ်ယူလိုက်သည်ဟု စိန်လေလံတင်ရောင်းချမှုကို ဦးစီးခဲ့သည့် Martin Rapaport အုပ်စုက ထုတ်ပြန်ခဲ့သည်။ ဒေါ်လာခုနစ်သန်းခန့်အထိ ဈေးရလိမ့်မည်ဟု ခန့်မှန်းထားသော အစိုးရအတွက်မူ ယခုဈေးက အနည်းငယ်စိတ်ပျက်စရာ ဖြစ်သွားလိမ့်မည်ဖြစ်သည်။