ဖေဖော်ဝါရီ ၅ ရက်က တရုတ်အလယ်ပိုင်း ဟီနန်ပြည်နယ် ကျန်ကျိုးမြို့ရှိ ဘူတာရုံ၌ အဆင့်မြင့်နည်းပညာ မျက်မှန်တပ်ဆင်ထားသည့် ရဲမေတစ်ဦးကို တွေ့ရစဉ် (Photo:AFP)

တရုတ်ရဲတပ်ဖွဲ့ဝင်များသည် လူစည်ကားသော ရထားဘူတာရုံတစ်ခုတွင် မသင်္ကာသူများကို ဖော်ထုတ်ပေးနိုင်သော အဆင့်မြင့် နည်းပညာသုံး နေကာမျက်မှန်များကို တပ်ဆင်နေကြပြီး မျက်နှာပြင်အား မှတ်သားသိရှိသည့် နည်းပညာကို နောက်ဆုံးအသုံးပြုမှု တစ်ခုဖြစ်လာခဲ့သည်။

တရုတ်အလယ်ပိုင်း ကျန်ကျိုးမြို့တွင် ဒစ်ဂျစ်တယ်နေကာ မျက်မှန်ဝတ်ဆင်ထားသော ရဲအရာရှိများ၏ မြင်ကွင်းက Black Mirror သိပ္ပံရုပ်သံဇာတ်လမ်းထဲမှ မြင်ကွင်းတစ်ခုကို အမှတ်ရစေမည်ဖြစ်သည်။ တရုတ်တွင် နှစ်သစ်ကူးကာလတွင် နိုင်ငံ၏ ရထား သယ်ယူပို့ဆောင်ရေးစနစ်၌ အစည်ကားဆုံး အချိန်ကာလတစ်ခုဖြစ်ပြီး ခရီးသည်ထောင်ပေါင်းများစွာသည် ဇာတိသို့ ရထားခရီးဖြင့် ပြန်ကြလေ့ရှိသည်။

စမတ်နေကာမျက်မှန် နည်းပညာကြောင့် ရဲတပ်ဖွဲ့ဝင်များသည် ယာဉ်တိုက်မှုဖြင့် ထွက်ပြေးနေသူများ၊ လူကုန်ကူးသူများစသည့် ပြစ်မှုများဖြင့် စွပ်စွဲခံထားရသူ ခုနစ်ဦးကို ဖမ်းဆီးရမိထားကြောင်း ကျန်ကျိုးမြို့၏ ရဲဌာနကို ကိုးကားပြီး အစိုးရ မီဒီယာ Peoples's Daily က ဖော်ပြခဲ့သည်။ ထို့ပြင် သက်သေခံအတုကို ပြုလုပ်သုံးစွဲနေကြသူ ၂၆ ဦးကိုလည်း ဖမ်းဆီးရမိခဲ့ကြောင်း ကျန်ကျိုးရဲဌာနက ဆိုသည်။

အဆင့်မြင့်နည်းပညာ နေကာမျက်မှန်သည် ဇီဝအချက်အလက် အခြေပြုအချက်အလက်ဘဏ်ကို အသုံးပြုပြီး ဒစ်ဂျစ်တယ် စောင့်ကြည့်ထောက်လှမ်းမှုစနစ် တည်ဆောက်ရန် ကြိုးပမ်းနေသော တရုတ်၏ အစီအစဉ် တစ်စိတ်တစ်ပိုင်းဖြစ်သည်။ တရုတ်က  တစ်နိုင်ငံလုံး၏ လှုပ်ရှားမှုများကို အနီးကပ် စောင့်ကြည့်ရန်အတွက် ဓာတ်ပုံများ၊ မျက်ရစ်များ၊ လက်ဗွေရာများ စသည့် အချက်အလက်မျိုးစုံ ဖြင့် မှတ်တမ်းပြုစုရန် ကြိုးပမ်းနေသည်။

နည်းပညာများ လျင်မြန်စွာ ဖွံ့ဖြိုးတိုးတက်မှုကြောင့် စားသောက်ဆိုင်များ၊ ကာယလေ့ကျင့်ရေးစခန်းများ၊ အများပြည်သူသုံး သန့်စင်ခန်းများအထိ မျက်နှာအမှတ်အသားပြု နည်းပညာကို သုံးစွဲလာနေကြသည်။

ကျန်ကျိုးမြို့ အရှေ့ဘက် ဘူတာရုံတွင် ဝင်ပေါက်များ၌ အရာရှိများက မျက်နှာကို မှတ်သားသိရှိနိုင်သော စမတ်နေကာမျက်မှန်များကို တပ်ဆင်ထားခဲ့ကြကြောင်း People's Daily က ဆိုသည်။ ယင်းမျက်မှန်များတွင်  စမတ်ဖုန်းကဲ့သို့ ကိရိယာများနှင့် ချိတ်ဆက်ထားသော ကင်မရာပါဝင်ပြီး မသင်္ကာသူများ၏ ပုံကို အရာရှိများက ဓာတ်ပုံရိုက်ယူကာ ဌာနချုပ်ရှိ အချက်အလက်ဘဏ်နှင့် တိုက်ဆိုင်စစ်ဆေးမည်ဖြစ်သည်။

မိုဘိုင်းဆော့ဖ်ဝဲလ်တစ်ခုက မသင်္ကာသူ၏ အမည်၊ နေရပ်လိပ်စာ၊ လူမျိုးအပါအဝင် အရေးကြီးအချက်အလက်များကို ရှာဖွေပေးမည်ဖြစ်ပြီး မသင်္ကာသူများသည် တရားခံ ပြေးဖြစ်နိုင်ခြေ ရှိ၊မရှိကိုလည်း ရဲအရာရှိကို အကြောင်းကြားပေးမည်ဖြစ်သည်။  တရုတ်သည် ပုဂ္ဂိုလ်ရေး လုံခြုံမှုအခွင့်အရေးဆိုင်ရာ ဥပဒေများ တင်းတင်းကျပ်ကျပ်မရှိသောကြောင့်  အနောက်နိုင်ငံများနှင့် နှိုင်းယှဉ်လျှင် မျက်နှာပြင် မှတ်သားစစ်ဆေးသည့် နည်းပညာကို သုံးစွဲရာ၌ ရှေ့ရောက်နေကြောင်း ကျွမ်းကျင်သူများကပြောကြားခဲ့သည်။ တရုတ်ဘဏ်များတွင်လည်း ကတ်များအစား မျက်နှာအမှတ်အသားကို အသုံးပြုသည့်စနစ်များကို စတင်အသုံးပြုနေမည်ဖြစ်သည်။