၂၀၁၆ ခုနှစ်ကုန်အထိ အဂတိလိုက်စားမှု တိုက်ဖျက်ရေးကော်မရှင်သို့ တိုင်ကြားစာ ၂၆၀၀ ကျော် ရောက်ရှိခဲ့ပြီး တရားစီရင်ရေးနှင့် သက်ဆိုင်သည့် တိုင်ကြားစာ ၃၂၀ ကျော်ပါဝင်

၂၀၁၆ ခုနှစ်ကုန်အထိ အဂတိလိုက်စားမှု တိုက်ဖျက်ရေးကော်မရှင်သို့ တိုင်ကြားစာ ၂၆၀၀ ကျော် ရောက်ရှိခဲ့ပြီး တရားစီရင် ရေးနှင့်သက်ဆိုင်သည့်ကိစ္စ တိုင်ကြားစာ ၃၂၀ ကျော် ပါဝင်ကြောင်း ကော်မရှင်၏ ထုတ်ပြန်ချက်အရ သိရသည်။

အဂတိလိုက်စားမှု တိုက်ဖျက်ရေးကော်မရှင်ရုံး စတင်ဖွင့်လှစ်သည့် ၂၀၁၄ ခုနှစ် မတ် ၁၀ ရက်မှ ၂၀၁၆ ခုနှစ် ဒီဇင်ဘာ ၃၁ ရက် အထိ ကော်မရှင်အဖွဲ့ထံသို့ လိပ်မူပေးပို့သည့် တိုင်ကြားစာနှင့် မိတ္တူပေးပို့သည့် တိုင်ကြားစာစုစုပေါင်း ၂၆၆၁ စောင် လက်ခံရရှိခဲ့ကြောင်း ကော်မရှင်က ထုတ်ပြန်ခဲ့သည်။

အဂတိလိုက်စားမှု တိုက်ဖျက်ရေးကော်မရှင်တွင် လက်ခံရရှိသည့် တိုင်ကြားစာများတွင် အဂတိလိုက်စားကြောင်း ဖော်ပြတိုင်ကြားခြင်း၊ စီမံခန့်ခွဲရေး/ အုပ်ချုပ်ရေးဆိုင်ရာ လွဲမှားဆောင်ရွက်ခြင်း၊ မြေယာကိစ္စ (လယ်ယာမြေစီမံခန့်ခွဲရေးကိစ္စ)၊ မြေသိမ်းဆည်းမှု ကိစ္စ၊ တရားမမှု၊ ပြစ်မှု၊ တရားစီရင်ရေးနှင့် သက်ဆိုင်သည့်ကိစ္စ၊  ဌာနဆိုင်ရာကိစ္စ၊ အလွဲသုံးစား၊ ပုဂ္ဂိုလ်ရေးဆိုင်ရာကိစ္စ၊ ပြန်လည်ရုပ်သိမ်းသော တိုင်ကြားစာအစရှိသည့် အကြောင်းအရာများပါဝင်ကြောင်း သိရသည်။

ကော်မရှင်မှလက်ခံရရှိသည့် တိုင်ကြားစာများတွင် ဌာနဆိုင်ရာကိစ္စ ၇၆၄ စောင်ဖြင့် အများဆုံးဖြစ်ပြီး မြေယာကိစ္စတိုင်ကြားစာ  ၄၁၉ စောင်၊ စီမံခန့်ခွဲရေး/ အုပ်ချုပ်ရေးဆိုင်ရာ လွဲမှားဆောင်ရွက်ခြင်းတိုင်ကြားစာ ၅၄၁ စောင်နှင့် တရားစီရင်ရေးနှင့်သက်ဆိုင်သည့် ကိစ္စတိုင်ကြားစာ ၃၂၃ စောင် ပါဝင်ကြောင်း သိရသည်။

တိုင်းဒေသကြီးနှင့် ပြည်နယ်အလိုက် တိုင်ကြားမှုအရေအတွက်မှာ နေပြည်တော် မှ ၉၃ စောင်၊ ကချင်ပြည်နယ်မှ ၂၈ စောင်၊ ကယားပြည်နယ်မှငါးစောင်၊ ကရင်ပြည်နယ်မှ၂၆ စောင်၊ ချင်းပြည်နယ်မှ ၁၉ စောင်၊ စစ်ကိုင်းတိုင်းဒေသကြီးမှ ၂၇၂ စောင်၊ တနင်္သာရီတိုင်းဒေသကြီးမှ ၁၉ စောင်၊ ပဲခူးတိုင်းဒေသကြီးမှ ၃၀၇ စောင်၊ မကွေးတိုင်းဒေသကြီးမှ ၈၅ စောင်၊မန္တလေးတိုင်းဒေသကြီး မှ ၄၅၃ စောင်၊ မွန်ပြည်နယ်မှ ၁၃၄ စောင်၊ ရန်ကုန်တိုင်းဒေသကြီးမှ ၇၁၇ စောင်၊ ရခိုင်ပြည်နယ်မှ ၄၁ စောင်၊ ရှမ်းပြည်နယ်မှ ၁၇၁ စောင်နှင့် ဧရာဝတီတိုင်းဒေသကြီးမှ ၂၉၁ စောင်ဖြစ်ကြောင်း သိရသည်။

အဂတိလိုက်စားမှုများနှင့် ပတ်သက်၍ တိုင်ကြားရာတွင် နစ်နာသူအနေဖြင့် တိုင်ကြားမှုထိရောက်စေရန် တိုင်ကြားစာ၌ မဖြစ်မနေပါဝင်ရမည့် အချက်များမှာ တိုင်ကြားသည့် အဂတိလိုက်စားမှုသည် ၂၀၁၃ ခုနှစ် စက်တင်ဘာ ၁၇ ရက်၏နောက်ပိုင်းဖြစ်သော အဂတိလိုက်စားမှုဖြစ်ရန်၊ လိုအပ်သည့် စုံစမ်းစစ်ဆေးမှု ပြုလုပ်ရာတွင် အထောက်အကူဖြစ်စေရန် အဂတိလိုက်စားကြောင်း ပြင်ပတွင်ကြားသိနေရသည့် အပြင်သိ၊ ပတ်ဝန်းကျင်အများ ပြောကြားနေသည့် သတင်းကြားတို့ဖြင့် တိုင်ကြားခြင်းမပြုဘဲ အရေးကြီးသည့် သက်သေခံချက်ပါရန်၊ စုံစမ်းစစ်ဆေးရမည့် ကိစ္စပါဝင်ပါက အမှန်တကယ်နစ်နာသူ ဟုတ် မဟုတ် သိရှိနိုင်ရန် နှင့် လိုအပ်ပါက ဆက်သွယ်မေးမြန်းခေါ်ယူနိုင်ရန် အခြားသူအမည်အား အလွဲသုံးစားပြုလုပ်တိုင်ကြားခြင်းမှ ကြိုတင်ကာကွယ်နိုင်ရန် တိုင်ကြားသူ၏ လက်မှတ်၊ အမည်၊ မှတ်ပုံတင်အမှတ်နှင့် မိတ္တူမဖြစ်မနေပါဝင်ရန်နှင့် တိုင်ကြားစာကို ကော်မရှင်သို့တိုင်ကြားရာတွင် မိတ္တူသာပေးပို့ပါက ကော်မရှင်အနေဖြင့် အရေးယူဆောင်ရွက်နိုင်မည် မဟုတ်သဖြင့် ကော်မရှင်သို့ တိုက်ရိုက်လိပ်မူ တိုင်ကြားရန် လိုအပ်မည်ဖြစ်ကြောင်း ထုတ်ပြန်ထားသည်။