ငြိမ်းချမ်းရေးလုပ်ငန်းစဉ် အောင်မြင်စေရန် တိုင်းရင်းသားပြည်သူတစ်ရပ်လုံးက အစိုးရနှင့်အတူ လက်တွဲပူးပေါင်း၍ ၀ိုင်းဝန်းကြိုးပမ်းအကောင်အထည်ဖော်ရန် လိုအပ်လျက်ရှိကြောင်း သမ္မတဦးထင်ကျော် ပြောကြား

ဇန်န၀ါရီ ၁၀ ရက်က ကချင်ပြည်နယ် မြစ်​ကြီးနားမ​နောကွင်းတွင်​ (၆၉) နှစ်​​မြောက်​ ကချင်​ပြည်​နယ်​​နေ့ အခမ်းအနား ကျင်းပ​နေစဉ်​

ငြိမ်းချမ်းရေးလုပ်ငန်းစဉ် အောင်မြင်စေရန် တိုင်းရင်းသားပြည်သူတစ်ရပ်လုံးက အစိုးရနှင့်အတူ လက်တွဲပူးပေါင်း၍ ၀ိုင်းဝန်းကြိုးပမ်း အကောင်အထည်ဖော်ရန် လိုအပ်လျက်ရှိကြောင်း  နိုင်ငံတော်သမ္မတဦးထင်ကျော်က ပြောကြားသည်။

ဇန်န၀ါရီ ၁၀ ရက်တွင် ကျရောက်သည့် (၆၉) နှစ်မြောက် ကချင်ပြည်နယ်နေ့ အခမ်းအနားသို့ ပေးပို့သည့် သ၀ဏ်လွှာတွင် သမ္မတ ဦးထင်ကျော်က ထိုသို့ ထည့်သွင်းပြောကြားခဲ့ခြင်း ဖြစ်သည်။

အဆိုပါ သ၀ဏ်လွှာ၌ ဇန်န၀ါရီ ၁၀ ရက်တွင် ကျရောက်သည့် (၆၉) နှစ်မြောက် ကချင်ပြည်နယ်နေ့ဖြစ်သည့် နေ့ထူးနေ့မြတ် အခါသမယတွင် ကချင်ပြည်နယ်အတွင်း မှီတင်းနေထိုင်လျက်ရှိကြသည့် တိုင်းရင်းသား ညီအစ်ကိုမောင်နှမ ပြည်ထောင်စုသား အားလုံးကောင်းကျိုးချမ်းသာ မင်္ဂလာအပေါင်းနှင့် ပြည့်စုံကြပါစေကြောင်း ဆုမွန်ကောင်းတောင်းပါကြောင်း၊ လွတ်လပ်ရေးရရှိပြီး ၁၉၄၈ခုနှစ်၊ ဇန်န၀ါရီ ၁၀ ရက်တွင် ကချင်ပြည်နယ် ကောင်စီညီလာခံ၏ ပထမဆုံးအစည်းအဝေးကျင်းပခဲ့ပြီး ကချင်ပြည်နယ်ကောင်စီ အစည်းအဝေးက ကချင်ပြည်နယ်အစိုးရအဖွဲ့ ဖွဲ့စည်းခဲ့ခြင်းကို ဂုဏ်ပြုသည့် အနေဖြင့် ဇန်န၀ါရီ ၁၀ ရက် ကို “ကချင်ပြည်နယ်နေ့” အဖြစ် သတ်မှတ်ပြဋ္ဌာန်းခဲ့ပြီး နှစ်စဉ်ကျင်းပခဲ့ကာ ယနေ့မှာဆိုရင် (၆၉) နှစ်မြောက်ခဲ့ပြီဖြစ်ကြောင်းနှင့် ကချင်ပြည်နယ်တွင် ခရိုင်လေးခရိုင်၊ မြို့နယ် ၁၈ မြို့နယ်၊ မြို့ ၃၀ မြို့ ပါဝင်ပြီး ဂျိန်းဖော့၊ ရ၀မ်၊ လီဆူ၊ လာချိတ်၊ လော်ဝေါ်၊ ဇိုင်ဝါး စသည့် ကချင်မျိုးနွယ်စုများ၊ တိုင်းလေ၊ တိုင်လိုင်၊ တိုင်းလုံ၊ တိုင်းဆာ၊ တိုင်းခန္တီး စသည့်ရှမ်းမျိုးနွယ်စုနှင့် ဗမာတိုင်းရင်းသားမျိုးနွယ်စုများ အပြင် အခြားတိုင်းရင်းသား မျိုးနွယ်စုအပါအ၀င် လူဦးရေ စုစုပေါင်း ၁၆ သိန်းကျော်သော တိုင်းရင်းသားလူမျိုးများ အတူတကွ ချစ်ကြည်ရင်းနှီးစွာ စုပေါင်းနေထိုင်ကြသည့်  ပြည်နယ်တစ်ခုလည်း ဖြစ်ပါကြောင်း  သမ္မတက သ၀ဏ်လွှာတွင် ထည့်သွင်းပေးပို့ခဲ့သည်။

ထို့အတူ ကချင်ပြည်နယ်သည် ရွှေ၊ ကျောက်စိမ်းစသည့် အဖိုးတန်သယံဇာတများ ပေါကြွယ်ဝသကဲ့သို့ အရှေ့တောင်အာရှ၏ တစ်ခုတည်းသော နှင်းဖုံးတောင်တန်းများရှိပြီး အလွန်သာယာလှပသည့် သဘာဝပတ်ဝန်းကျင်များကို ပိုင်ဆိုင်ထားကြောင်း၊ ထို့ပြင် မြန်မာနိုင်ငံ၏ အသက်သွေးကြောဟု ဆိုနိုင်သည့် ဧရာဝတီမြစ်စတင်မြစ်ဖျားခံရာ ဒေသတစ်ခုလည်းဖြစ်ကြောင်း၊ ထိုကဲ့သို့ သာယာလှပ၍ သယံဇာတ ပေါကြွယ်ဝသည့် ကချင်ပြည်နယ်သည် လက်နက်ကိုင်ပဋိပက္ခများကြောင့် သဘာဝ အလှအပများကိုလည်း မခံစားနိုင်၊ သယံဇာတများကိုလည်း ဖွံ့ဖြိုးရေး လုပ်ငန်းများတွင် ထိရောက်စွာ အသုံးမပြုနိုင် ဘဲဖြစ်နေရကြောင်း သ၀ဏ်လွှာတွင် ဖော်ပြထားသည်။

ဖွံ့ဖြိုးတိုးတက်ရေး လုပ်ငန်းများကို အကောင်အထည်ဖော ဆောင်ရွက်ရာတွင် နယ်မြေတည်ငြိမ်အေးချမ်းပြီး တရားဥပဒေစိုးမိုးမှသာ အောင်မြင်နိုင်မည်ဖြစ်ကြောင်း၊ ပြည်နယ်တစ်ခုလုံး ဖွံ့ဖြိုးတိုးတက်ရေး ဆောင်ရွက်ရာတွင်လည်း နယ်မြေတည်ငြိမ်အေးချမ်းမှသာ ဒေသအသီးသီး၊ ကဏ္ဍအသီးသီးဟန်ချက် ညီညီ ဖွံ့ဖြိုးတိုးတက်လာမည်ဖြစ်ကြောင်း ပြည်နယ်အတွင်း နေထိုင်ကြသည့် တိုင်းရင်းသားပြည်သူများသည် ငြိမ်းချမ်းရေး၏ အရသာကို သိရှိပြီးဖြစ်သကဲ့သို့ ယခုအချိန်တွင်လည်း ငြိမ်းချမ်းရေးကို အလွန်တောင့်တလျက်ရှိကြပြီး ငြိမ်းချမ်းရေးရရှိရန်မှာလည်း ပြည်သူတစ်ရပ်လုံး၏ ကြီးမားသည့်ဆန္ဒဖြစ်သည်ဟု သ၀ဏ်လွှာတွင် ထည့်သွင်းဖော်ပြထားသည်။ 

ထို့ပြင် သ၀ဏ်လွှာတွင် သမ္မတက လက်ရှိအချိန်သည် အတိတ်သမိုင်းက အကြောင်းအမျိုးမျိုးကြောင့် ပေါ်ပေါက်ခဲ့ရသည့် လက်နက်ကိုင်ပဋိပက္ခများ ချုပ်ငြိမ်းကာ ရေရှည်တည်တံ့မည့် စစ်မှန်သည့် ထာဝရငြိမ်းချမ်းရေးရရှိရန် တိုင်းရင်းသားအားလုံးက စိတ်ရင်းမှန်ဖြင့် ကြိုးပမ်းဆောင်ရွက်ရမည့် အချိန်လည်းဖြစ်ကြောင်း၊ နိုင်ငံတော်အစိုးရ အနေဖြင့်လည်း ပြည်ထောင်စုငြိမ်းချမ်းရေး ညီလာခံ-၂၁ရာစုပင်လုံ ပထမအကြိမ် အစည်းအဝေးကို ၂၀၁၆ခုနှစ် သြဂုတ် ၃၁ မှ စက်တင် ဘာ ၃ရက်အထိ နေပြည်တော်တွင် ကျင်းပခဲ့ကြောင်း၊ ညီလာခံ၏ အန္တိမရည်မှန်းချက်မှာ ပြည်တွင်းငြိမ်းချမ်းရေးမှတစ်ဆင့် ဒီမိုကရေစီ ဖက်ဒရယ်ပြည်ထောင်စု တည်ဆောက်ရန် ရည်ရွယ်ထားပြီး နိုင်ငံရေးပြဿနာများကို နိုင်ငံရေးနည်းလမ်းဖြင့် ဖြေရှင်းနိုင်ရန်နှင့် တိုင်းရင်းသားများ၏ အခြေခံအခွင့်အရေး၊ တန်းတူညီမျှရေးတို့အတွက် အရေးကြီးသည့် လုပ်ငန်းစဉ်များကို ညှိနှိုင်းဆွေးနွေးအဖြေရှာကြရန်ဖြစ်ကြောင်း ထည့်သွင်းပြောကြားသည်။

ကချင်ပြည်နယ်အပါအ၀င် တစ်နိုင်ငံလုံး ငြိမ်းချမ်းမှုရရှိရေးအတွက် အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာနကို ဖွဲ့စည်းဆောင်ရွက်လျက်ရှိပြီး ငြိမ်းချမ်းရေးလုပ်ငန်းစဉ်ကြီးတစ်ရပ်လုံး အောင်မြင်စေရန် တိုင်းရင်းသားပြည်သူတစ်ရပ်လုံးက လက်တွဲပူးပေါင်းပြီး ၀ိုင်းဝန်းကြိုးပမ်း အကောင်အထည်ဖော်ပေးကြရန် လိုအပ်လျက်ရှိကြောင်း သ၀ဏ်လွှာတွင် ထည့်သွင်းပြောကြားသည်။                                             

Writer: 
ဇာလီမြင့်ဦး