ရန်ကုန်တိုင်းဒေသကြီးအတွင်း မြို့တော်စည်ပင်သာယာရေး ကော်မတီမှ ချထားပေးသည့် လိုင်စင်ခုနစ်မျိုးအနက် လုပ်ငန်းလိုင်စင် ချထားပေးမှုသည် လေးသောင်းသုံးထောင်ကျော်ဖြင့် အများဆုံးဖြစ်ကြောင်း မြို့တော်ဝန်ပြောကြား

ရန်ကုန်တိုင်းဒေသကြီးအတွင်း မြို့တော်စည်ပင်သာယာရေး ကော်မတီမှ ချထားပေးသည့် လိုင်စင်ခုနစ်မျိုးအနက် လုပ်ငန်းလိုင်စင် ချထားပေးမှုသည် လေးသောင်းသုံးထောင် ကျော်ဖြင့် အများဆုံး ဖြစ်ကြောင်း မတ် ၂၀ ရက်က ကျင်းပသည့် ဒုတိယအကြိမ်မြောက် ရန်ကုန်တိုင်းဒေသကြီး လွှတ်တော် စတုတ္ထပုံမှန် အစည်းအဝေး ပထမနေ့တွင် မြို့တော်ဝန် ဦးမောင်မောင်စိုးက ပြောကြားသည်။

လမ်းမတော်မြို့နယ် မဲဆန္ဒနယ်အမှတ် (၁) လွှတ်တော်ကိုယ်စားလှယ် ဒေါ်အေးအေးမာက ရန်ကုန်တိုင်းဒေသကြီး အတွင်းရှိ မြို့နယ်များနှင့် မြို့နယ်စည်ပင်သာယာ သက်ဆိုင်ရာ တာဝန်ပေးထားသော ဌာနများမှ အသေးစား၊ အလတ်စား လုပ်ငန်းများသည် သက်ဆိုင်ရာဥပဒေ၊ နည်းဥပဒေများနှင့် ထုတ်ပြန်ထားသော စည်းမျဉ်း၊ စည်းကမ်းများနှင့်အညီ ဆောင်ရွက်နေသော လုပ်ငန်းအရေအတွက် မည်မျှရှိသည်ကို သိရှိလိုကြောင်း၊ အသေးစားနှင့် အလတ်စားလုပ်ငန်း ရေရှည်တည်တံ့စေရန်နှင့် လုပ်ငန်းရှင်တို့၏ စွမ်းဆောင်ရည် မြင့်မားလာစေရန် ရန်ကုန်တိုင်းဒေသကြီး အစိုးရအနေဖြင့် မည်ကဲ့သို့ ပံ့ပိုးကူညီ ဆောင်ရွက်နေပြီး နှစ်စဉ်ဘတ်ဂျက်သုံးစွဲငွေနှင့် အခြားနိုင်ငံများမှ ကူညီထောက်ပံ့ငွေ မည်မျှရှိသည်ဟု ကြယ်ပွင့်ပြမေးခွန်းအား မေးမြန်းမှုနှင့် ပတ်သက်ပြီး ဦးမောင်မောင်စိုးက ပြန်လည်ဖြေကြားရာတွင် ထည့်သွင်းပြောကြား ခဲ့ခြင်းဖြစ်သည်။

“ရန်ကုန်မြို့တော် စည်ပင်သာယာရေး ကော်မတီရဲ့ နယ်နိမိတ်အတွင်းမှာ ဆောင်ရွက်နေတဲ့ လုပ်ငန်းများနဲ့ ပတ်သက်လို့ အသေးစား၊ အလတ်စားဆိုပြီး ခွဲခြားထားတာ မရှိပါဘူး။ သို့သော်လည်း ဆောင်ရွက်တဲ့ လုပ်ငန်းပေါ် မူတည်ပြီးတော့ အစားအသောက် လိုင်စင်၊ လုပ်ငန်းလိုင်စင်၊ တည်းခိုခန်းလိုင်စင်၊ ဘော်ဒါဆောင်လိုင်စင်၊ ကိုယ်ပိုင်ဈေးလိုင်စင်၊ ယာဉ်နှင့်လှည့်လည် ရောင်းချခွင့်လိုင်စင်၊ ယာယီဇာတ်ရုံခွင့်ပြုမိန့် စသည်ဖြင့် အမျိုးအစား ခုနစ်မျိုး ခွဲခြားပြီးတော့မှ ၂၀၁၃ ခုနှစ် ရန်ကုန်မြို့တော် စည်ပင်သာယာရေး ဥပဒေအရ လိုင်စင်များအား ခွင့်ပြုဆောင်ရွက် ပေးနေပါတယ်။ လက်ရှိခွင့်ပြု ဆောင်ရွက်ပေးနေတဲ့ လိုင်စင်ကတော့ အစားအသောက်လိုင်စင် ၈၁၄၁ ခု၊ လုပ်ငန်းလိုင်စင် ၄၃၂၈၅ ခု၊ တည်းခို ခန်းလိုင်စင် ၄၃၁ ခုနဲ့ ဘော်ဒါဆောင်လိုင်စင် ၃၉၁ ခုနဲ့ ကိုယ်ပိုင်ဈေးလိုင်စင် ၉၁ ခု၊ ယာဉ်ဖြင့် လှည့်လည်ရောင်းချခွင့်လိုင်စင် ၂၃၂ ခုနဲ့ ကိုယ်ပိုင်ဇာတ်ရုံ ခွင့်ပြုမိန့် ၂၈ ခုဖြစ်ပါတယ်” ဟု ဦးမောင်မောင်စိုးက ဆိုသည်။

ထို့ပြင် ရန်ကုန်စည်ပင်သာယာရေး ကော်မတီအနေဖြင့် လုပ်ငန်းများကို အသေးစား၊ အလတ်စားလုပ်ငန်းများ ခွဲခြားထားခြင်း မရှိကြောင်း၊ သို့သော်လည်း အသေးစား၊ အလတ်စား လုပ်ငန်းများနှင့် ပတ်သက်သည့် သက်ဆိုင်ရာဥပဒေ၊ နည်းဥပဒေများအတိုင်း လုပ်ဆောင်နေသည့် လုပ်ငန်းအရေအတွက် ၁၇၀၀ ကျော် ရှိကြောင်း ၎င်းကဆက်လက် ပြောကြားသည်။

“ဒါကြောင့် ရန်ကုန်မြို့တော် စည်ပင်သာယာရေး ကော်မတီအနေနဲ့ လုပ်ငန်းများကို အသေးစား အလတ်စား ခွဲခြားခြင်း မရှိဘဲနဲ့ လျှောက်ထားလာတဲ့ လုပ်ငန်းအမျိုးအစားကိုယူကာ လုပ်ထုံးလုပ်နည်းနဲ့အညီ စိစစ်ပြီးတော့ ခွင့်ပြုလျက်ရှိပါတယ်။ သို့သော်လည်း အသေးစား၊ အလတ်စားကိစ္စက မြန်မာပြည် တစ်ပြည်လုံးအတွက် အရေးပါတဲ့ သိလည်းသိသင့်တဲ့ အခြေအနေလည်း ဖြစ်ပါတယ်။ သို့ သော်လည်း ကျွန်တော်တို့ The Whole Economic ရဲ့ ရာခိုင်နှုန်း ၉၀ က အသေးစား၊ အလတ်စား လုပ်ငန်းတွေ ဖြစ်တယ်လို့ စာရင်းဇယားများအရ သိရပါတယ်။ အဲဒီတော့ အသေးစား၊ အလတ်စား လုပ်ငန်းတွေရဲ့ သက်ဆိုင်ရာ ဥပဒေ၊ နည်းဥပဒေများနဲ့ ထုတ်ပြန်ထားတဲ့ စည်းမျဉ်းစည်းကမ်းတွေနဲ့အညီ ဆောင်ရွက်နေတဲ့ SME member တွေတော့ရှိပါတယ်။ လုပ်ငန်းအရေအတွက်ကတော့ ၁၇၅၆ ဦးရှိပါတယ်” ဟု ဦးမောင်မောင်စိုးက ပြောကြားသည်။

ထို့ပြင် အသေးစား၊ အလတ်စား လုပ်ငန်းများ ရေရှည်ဖွံ့ဖြိုး တိုးတက်ရန်အတွက် အစိုးရအနေဖြင့် အလုပ်ရုံဆွေးနွေးပွဲ ပြုလုပ်ခြင်းများ နိုင်ငံတကာမှ အကူအညီများဖြင့် ကူညီထောက်ပံ့မှုများ ပြုလုပ်ပေးနေကြောင်း ဦးမောင်မောင်စိုးက ဆိုသည်။

“ရန်ကုန်တိုင်းဒေသကြီး အစိုးရအဖွဲ့အနေနဲ့ အသေးစား၊ အလတ်စား လုပ်ငန်းများ ရေရှည်တည်တံ့စေရန်နဲ့ လုပ်ငန်းရှင်တွေရဲ့ စွမ်းဆောင်ရည် မြင့်မားစေရန်အတွက် အလုပ်ရုံဆွေးနွေးပွဲတွေ လုပ်ပြီးတော့ ပံ့ပိုးဆောင်ရွက်မှုတွေ ရှိပါတယ်။ နောက်ပြီး စက်မှုကြီးကြပ်ရေးနဲ့ စစ်ဆေးရေးဦးစီးဌာန အသေးစားနှင့် အလတ်စား ဖွံ့ဖြိုးတိုးတက်ရေး ဌာနအနေနဲ့၊ ၂၀၁၂ ခုနှစ်ကနေပြီးတော့ ၂၀၁၇ ခုနှစ်အထိ အစိုးရဌာနများမှ ဘတ်ဂျက်ရယူပြီးတော့ သုံးစွဲမှုများမရှိပါဘူး။ အခြားနိုင်ငံများက ကူညီထောက်ပံ့မှုအနေနဲ့ ပုဂ္ဂိလကကဏ္ဍ ဖွံ့ဖြိုးတိုးတက်ရေး စီမံကိန်းများအတွက် စီမံချက်တွေနဲ့ ဒေါ်လာ ၂ ဒသမ ၈ သန်း၊ ယူရိုဒေါ်လာ ၁၄ ဒသမ ၀၅ သန်းဖြင့် ၂၀၁၂ ခုနှစ်မှ ၂၀၁၇ ခုနှစ်အတွင်းမှာ တိုင်းဒေသကြီး၊ ပြည်နယ်၊ ပြည်ထောင်စုနယ်မြေ အပါအ၀င် စုစုပေါင်းနေရာ ၁၅ နေရာမှာ သုံးစွဲခဲ့ပါတယ်။ အဲဒီ ဒေါ်လာ ၂ ဒသမ၈ သန်း၊ ယူရိုဒေါ်လာ ၁၄ ဒသမ ၀၅ သန်းကလဲ သက်ဆိုင်ရာ INGO အဖွဲ့အစည်းများက ပရောဂျက်ခေါင်းစဉ် အလိုက်သာ သုံးစွဲခြင်းဖြစ်ကြောင်းနဲ့ တိုင်းဒေသကြီး အစိုးရအနေဖြင့် ငွေကြေးကိုင်တွယ် သုံးစွဲမှု မရှိပါဘူး” ဟု ဦးမောင်မောင်စိုးက ပြောကြားသည်။   

Writer: 
ဆန်းထူးအောင်၊ ထက်ရှိုင်း