ရန်ကုန်-မန္တလေးအမြန်လမ်း အဆင့်မြှင့်တင်ခြင်း စီမံကိန်းအတွက် ၁၁၅ မိုင်အထိ အာရှဖွံ့ဖြိုးရေးဘဏ်နှင့် AIIB ၏ ချေးငွေရရှိခဲ့ပြီး အခြားလမ်းပိုင်းများအတွက် အပြည်ပြည်ဆိုင်ရာ အဖွဲ့အစည်းများနှင့် ညှိနှိုင်းနေ

ရန်ကုန်-မန္တလေး အမြန်လမ်းမကြီးရှိ ရန်ကုန်-နေပြည်တော် လမ်းပိုင်းတစ်နေရာကို တွေ့ရစဉ် (ဓာတ်ပုံ-နီလာ)

ရန်ကုန်-မန္တလေး အမြန်လမ်း အဆင့်မြှင့်တင်ခြင်း စီမံကိန်းအတွက် ၁၁၅ မိုင်အထိ အာရှဖွံ့ဖြိုးရေးဘဏ်နှင့် Asia Intrasturcture Investment Bank ၏ ချေးငွေရရှိခဲ့ပြီး အခြားလမ်းပိုင်းများအတွက် အပြည်ပြည်ဆိုင်ရာ အဖွဲ့အစည်းများနှင့် ညှိနှိုင်းနေကြောင်း ဆောက်လုပ်ရေး ၀န်ကြီးဌာနမှ သိရသည်။

ဆောက်လုပ်ရေး ၀န်ကြီးဌာနအနေဖြင့် ရန်ကုန်-မန္တလေး အမြန်လမ်းတစ်လျှောက်လုံး ၃၆၆ မိုင် ၃ ဖာလုံကို အမြန်လမ်း အဆင့်အတန်းနှင့်အညီ Fully Access Control ဖြစ်ရန်အတွက် နိုင်ငံတကာ အဖွဲ့အစည်းများနှင့် ညှိနှိုင်းခဲ့မှုမှာ လွန်ခဲ့သည့် နှစ်အနည်းငယ်က စတင်ခဲ့ခြင်းဖြစ်သည်။

ပထမအဆင့်အနေဖြင့် ထောက်ကြန့် မိုင်တိုင် (၀/၀)မှ ဘောနတ်ကြီးလမ်းဆုံ (၄၀/၀) အထိ အာရှဖွံ့ဖြိုးရေးဘဏ် ချေးငွေအကူအညီဖြင့် နိုင်ငံတကာ အဆင့်မီ ဆောင်ရွက်သွားမည်ဖြစ်ကြောင်း၊ မိုင်(၄၀/၀)မှ (၁၁၅/၀)အထိကို AIIB ၏ ချေးငွေအကူအညီဖြင့် အဆင့်မြှင့်တင်မည်ဖြစ်ကြောင်း သိရသည်။

ကျန်လမ်းပိုင်းများအတွက် အပြည်ပြည်ဆိုင်ရာ အဖွဲ့အစည်းများနှင့် ညှိနှိုင်းလျက်ရှိပြီး အဆင့်မြှင့်တင် တည်ဆောက်မည့် လမ်းပိုင်း၏ ဖြတ်ပိုင်းပုံနှင့် Plan ပုံတို့မှာ အတွင်းလမ်းပခုံး တစ်မီတာ၊ အပြင်လမ်းပခုံး ၂ ဒသမ ၅ မီတာပါဝင်သော လေးလမ်းသွား AC လမ်းအဖြစ် ဆောင်ရွက်မည်ဖြစ်သည်။

Guard rails နှင့် Fencing များ ပါဝင်သော Fencing ၏ အပြင်ဘက်တွင် ဒေသခံများ လွတ်လပ်စွာ သွားလာနိုင်ရန် Service Road တစ်လမ်းစီ ပါဝင်မည်ဖြစ်ကြောင်း ဆောက်လုပ်ရေး ၀န်ကြီးဌာနမှ သိရသည်။

လက်ရှိ ရန်ကုန်-မန္တလေး လမ်းပိုင်း၏ Master Plan Rest Camp 10 နေရာ ဖွင့်ရန်ရှိသော်လည်း ခုနစ်နေရာသာ ဖွင့်လှစ်နိုင်သေးကြောင်း၊ ကျန်ရှိသည့် သုံးနေရာအတွက် မြေရရှိရေး လယ်သမားများနှင့် ညှိနှိုင်းနေဆဲ အဆင့်ရှိကြောင်း၊ လမ်းပိုင်းတွင် Flexible Pavement (AC) မခင်းနိုင်သေးသည့်အတွက် နိုင်ငံတကာအဆင့် မမီသေးကြောင်း ဆောက်လုပ်ရေး ၀န်ကြီးဌာနမှ သိရသည်။

ရန်ကုန်-မန္တလေး အမြန်လမ်းမကြီးမှာ ယာဉ်မတော်တဆ ဖြစ်ပွားမှု များပြားမှုအပြင် သေဆုံးမှု တိုးတက်နေခြင်းကြောင့် အဆင့်မြှင့်တင်မှု ပြုလုပ်ရန် ဝေဖန်မှုများ ရှိခဲ့ပြီးနောက် အစိုးရမှ ယင်းလမ်းပိုင်းကို အဆင့်မြှင့်တင်ရန် စီစဉ်ခဲ့ခြင်းလည်းဖြစ်သည်။

                                              

Writer: 
အောင်ရဲကို