International

ပျောက်ဆုံး MH 370 လေယာဉ်သည် ယခင်ရှာဖွေရေးဇုန်၏ မြောက်ဘက်တွင် ရှိနေနိုင်ဟု ကျွမ်းကျင်သူများက ပြောကြား

ပျောက်ဆုံးနေသော MH 370 လေယာဉ်သည် အိန္ဒိယသမုဒ္ဒရာထဲမှ ဝေးလံခေါင်သီသော နေရာတွင်ရှိသည့် ရှာဖွေရေးဇုန်အဟောင်း၏ မြောက်ဘက်တွင် ရှိနေနိုင်ခြေ အများဆုံးရှိသည်ဟု သြစတြေးလျ အာဏာပိုင်တို့က ဧပြီ ၂၂ ရက်တွင် ပြောကြားခဲ့သည်။ ယင်းသတင်းအသစ်ကြောင့် ပျောက်ဆုံးနေသော လေယာဉ်သည် တစ်နေ့နေ့တွင် ပြန်လည်တွေ့နိုင်လိမ့်မည်ဟု မျှော်လင့်ချက်များကို မြင့်တက်စေခဲ့သည်။

မြေယာအငြင်းပွားမှုနှင့် ပတ်သက်၍ ဖမ်းဆီးထားသူများအား ဗီယက်နမ်ရွာသားများက ပြန်လွှတ်ပေးခဲ့

မြေယာအငြင်းပွားမှုနှင့် ပတ်သက်၍ ဗီယက်နမ်ရှိ ရွာသားများက ရဲနှင့်တာဝန်ရှိသူ တစ်ဒါဇင်ကျော်အား သီတင်းပတ်ကြာ ဖမ်းဆီးထားမှုကို ဧပြီ ၂၂ ရက်တွင် ပြန်လွှတ်ပေးခဲ့ပြီး နိုင်ငံတစ်ဝန်း စိတ်ဝင်စားခဲ့သော ယင်းပဋိပက္ခ အဆုံးသတ်ခဲ့ကြောင်း အစိုးရပိုင်မီဒီယာက ဖော်ပြခဲ့သည်။

ဘလူချီစတန်သူပုန်များ ပါကစ္စတန်အစိုးရထံ လက်နက်ချ

ပါကစ္စတန် အစိုးရသည် အနောက်တောင်ဘက် ဘလူချီစတန်ပြည်နယ်တွင် တရုတ်-ပါကစ္စတန် စီးပွားရေး စင်္ကြံအကောင်အထည်ဖော်ရန် ကြိုးပမ်းနေစဉ် ဘလူချီစတန် သူပုန် ၅၀၀ ခန့်သည် ဧပြီ ၂၁ ရက်က အစိုးရထံ လာရောက် လက်နက်ချခဲ့ကြသည်။

အကြီးတန်းတပ်မှူး ရှစ်ဦးထက်မနည်း အပါအ၀င် သူပုန် ၄၈၇ ဦးသည် ကွေအက်တာမြို့တွင် တရားဝင် အခမ်းအနားဖြင့် လက်နက်ပေးအပ်ခဲ့ကြောင်း သိရသည်။

ပြည်နယ်ဝန်ကြီးချုပ် တက်ရောက်ခဲ့သော လက်နက်အပ်နှင်း အခမ်းအနားတွင် သူပုန်တို့က ပါကစ္စတန်အစိုးရနှင့် ပူးပေါင်းဆောင်ရွက်သွားမည်ဟု ကတိပြုခဲ့ကြသည်။

အာဖဂန်စစ်စခန်းအား တာလီဘန်တို့၏ တိုက်ခိုက်မှုကြောင့် အာဖဂန်စစ်သား ၁၀၀ ကျော် သေဆုံးဒဏ်ရာရခဲ့

အာဖဂန်မြောက်ပိုင်းရှိ စစ်ဘက်စခန်းတစ်ခုအား တာလီဘန်တို့၏ ပူးပေါင်းတိုက်ခိုက်မှုအတွင်း အာဖဂန်စစ်သား ၁၀၀ ကျော်သေဆုံး၊ ဒဏ်ရာရခဲ့ကြောင်း အာဖဂန် ကာကွယ်ရေးဝန်ကြီးဌာနက ဧပြီ ၂၂ ရက်တွင် ထုတ်ပြန်ခဲ့သည်။ ယင်းတိုက်ခိုက်မှု ဖြစ်ပွားခဲ့သည့်အချိန်တွင် စစ်သားအများစုသည် သောကြာနေ့ ၀တ်ပြုနေကြကြောင်း၊ အာဖဂန်စစ်သား ၁၀၀ ကျော်သေဆုံး၊ ဒဏ်ရာရခဲ့ကြောင်း ယင်းဌာနက ကြေညာချက်ထုတ်ပြန်ခဲ့သည်။

ဖိလစ်ပိုင်သို့ ရောက်လာသည့် ရုရှားစစ်သင်္ဘောပေါ်သို့ ဒူတာတေး တက်ရောက်ကြည့်ရှု

လေးလနီးပါးကြာ ကာလအတွင်း ဖိလစ်ပိုင်သို့ ဒုတိယအကြိမ် ရောက်လာသည့် ရုရှားစစ်သင်္ဘောပေါ်သို့ ဧပြီ ၂၁ ရက်တွင် ဖိလစ်ပိုင်သမ္မတ ရိုဒရီဂိုဒူတာတေးက သွားရောက်ကြည့်ရှု လေ့လာခဲ့ကြောင်း သိရသည်။ ဒူတာတေးသည် ယင်းကဲ့သို့ ရုရှားစစ်သင်္ဘောပေါ်သို့ သွားရောက်ပြခဲ့ခြင်းဖြင့် ၎င်းနှင့် ရုရှားအစိုးရတို့ကြားတွင် ပိုမိုနီးကပ်မှုရှိလာကြောင်းကို ထင်ရှားစေခဲ့သည်။