International

မြောက်ကိုရီးယားက တိုက်ချင်းပစ်ဒုံးကျည်အတွက် ဖြစ်နိုင်သော ဒုံးအင်ဂျင်အား စမ်းသပ်ခဲ့ဟု အမေရိကန် ပြောကြား

တိုက်ချင်းပစ် ပဲ့ထိန်းဒုံးကျည်တွင် တပ်ဆင်နိုင်ဖွယ်ရှိသည့် ဒုံးအင်ဂျင်တစ်ခုကို မြောက်ကိုရီးယားက စမ်းသပ်ခဲ့သည်ဟု အမေရိကန် အရာရှိတစ်ဦးက ဇွန် ၂၂ ရက်တွင် အေအက်ဖ်ပီသတင်းဌာနသို့ ပြောကြားခဲ့သည်။ ကင်ဂျုံအွန်၏  နျူကလီးယားလက်နက် စီမံကိန်းကြောင့် တင်းမာမှုများ မြင့်တက်နေစဉ် ယခုသတင်း ထွက်ပေါ်လာခြင်းဖြစ်သည်။

“မြောက်ကိုရီးယားဟာ ဒုံးအင်ဂျင်တစ်ခုကို ဒီနေ့ စမ်းသပ်ခဲ့ပါတယ်” ဟု အမည်မဖော်လိုသော ထိုအမေရိကန် အရာရှိက ပြောကြားခဲ့ပြီး အခြား အသေးစိတ် အချက်များကို မထုတ်ဖော်ခဲ့ပေ။

ဆိုက်ဘာတိုက်ခိုက်ခံရပြီးနောက် ဟွန်ဒါက ဂျပန်ကားထုတ်လုပ်ရေးစက်ရုံကို ပိတ်ခဲ့ရ

ပြီးခဲ့သည့်လက ကမ္ဘာတစ်ဝန်းရှိ ကွန်ပျူတာထောင်ပေါင်းများစွာအပေါ် သက်ရောက်ခဲ့သော ငွေတောင်းခံသည့် ဆိုက်ဘာတိုက်ခိုက်မှုမျိုးကို ဟွန်ဒါက ထပ်မံကြုံတွေ့ခဲ့ရသဖြင့် ဂျပန်ရှိ ကားထုတ်လုပ်ရေး စက်ရုံတစ်ရုံအား ယာယီခေတ္တပိတ်ခဲ့ရကြောင်း ဇွန် ၂၁ ရက်တွင် ထုတ်ပြန်ခဲ့သည်။ ဂျပန်ကားထုတ်လုပ်ရေး လုပ်ငန်းဟွန်ဒါသည် တိုကျိုအနီးမှ ဆေယာမာစက်ရုံ၏ ကွန်ပျူတာစနစ်တွင် WannaCry ဗိုင်းရပ်စ် ကူးစက်ခံရကြောင်းကို တွေ့ရှိခဲ့ပြီးနောက် ဇွန် ၁၉  ရက်က စက်ရုံကို ပိတ်လိုက်ခြင်းဖြစ်ကြောင်း သိရသည်။ ထိုဗိုင်းရပ်စ်သည် ကွန်ပျူတာရှိ ဖိုင်များအားလုံးကို ပိတ်လိုက်ပြီး အသုံးပြုသူက ငွေပေးမှသာ ပြန်ပွင့်မည်ဖြစ်သည်။

ကမ္ဘာ့လူဦးရေ ၂၀၅၀ ပြည့်နှစ်တွင် ၉ ဒသမ ၈ ဘီလျံသို့ ရောက်ရှိမည်

ကမ္ဘာ့လူဦးရေသည် လောလောဆယ်တွင် ၇ ဒသမ ၆ ဘီလျံ ရှိရာမှ ၂၀၅၀ ပြည့်နှစ်တွင် ၉ ဒသမ ၈ ဘီလျံသို့ ရောက်ရှိမည်ဖြစ်ပြီး အိန္ဒိယက ခုနစ်နှစ်အတွင်း တရုတ်ကို ကျော်တက်၍ ကမ္ဘာ့လူ ဦးရေအများဆုံးနိုင်ငံ ဖြစ်လာမည်ဟု ကုလသမဂ္ဂ အစီရင်ခံစာ တစ်စောင်က ဇွန် ၂၁ ရက်တွင် ဖော်ပြခဲ့သည်။

နိုင်ဂျီးရီးယားသည် ၂၀၅၀ ပြည့်နှစ် မတိုင်မီတွင် အမေရိကန်ကို ကျော်တက်ပြီး ကမ္ဘာတွင် လူဦးရေ တတိယအများဆုံးနိုင်ငံဖြစ်လာမည်ဟု ကုလသမဂ္ဂစီးပွားရေးနှင့် လူမှုရေးဌာနက ထုတ်ပြန်သော စာရင်းအင်းများတွင် ဖော်ပြသည်။

အာဖဂန် ကြည်းတပ်အတွက် ဈေးကြီးသော တူညီဝတ်စုံများ ၀ယ်ယူခဲ့ခြင်းဖြင့် ပင်တဂွန်က ငွေကြေးများဖြုန်းတီးခဲ့ဟု အမေရိကန်အစိုးရ စောင့်ကြည့်အဖွဲ့တစ်ဖွဲ့က ဝေဖန်

ပင်တဂွန်သည် ဈေးကြီးသောတူညီဝတ်စုံများကို အာဖဂန် ကြည်းတပ်အတွက် ၀ယ်ယူခဲ့ပြီး ဒေါ်လာ ၂၈ သန်းခန့် လေလွင့်စေခဲ့ကြောင်း အာဖဂန် ပြန်လည်တည်ဆောက်ရေး စစ်ဆေးရေးမှူးချုပ်ရုံးက ဇွန် ၂၁ ရက်တွင် ပြောကြားခဲ့သည်။ အစိမ်းရင့်ရောင် ကိုယ်ယောင်ဖျောက် စစ်ဝတ်စုံများဝယ်ယူရန် ၂၀၀၇ ခုနှစ်က ချမှတ်ခဲ့သော ဆုံးဖြတ်ချက်သည် မလိုအပ်ဘဲ ဒေါ်လာသန်းပေါင်းများစွာ ဖြုန်းတီးမှုဖြစ်ကြောင်း အမေရိကန်အစိုးရကို စောင့်ကြည့်သည့်အဖွဲ့ တစ်ဖွဲ့ဖြစ်သော Special Inspector General Afghanistan Reconstruction က ထုတ်ပြန်သော အစီရင်ခံစာတွင် ဖော်ပြခဲ့သည်။

ဘဂ္ဂဒါဒီက သူ့ဘာသာ အကြီးအကဲအဖြစ် ကြေညာခဲ့ရာ ဗလီကို IS တို့ ဖောက်ခွဲဖျက်ဆီး

ဇွန် ၂၁ ရက်တွင် IS အဖွဲ့သည် မိုဆူးမြို့ရှိ အထင်ကရ အဆောက်အအုံတစ်ခုဖြစ်သော ယိုင်နေသည့် ဗလီမျှော်စင်နှင့်ယင်းနှင့် ကပ်လျက်ရှိသော ဗလီတို့အား ဖောက်ခွဲဖျက်ဆီးပစ်လိုက်ကြောင်း သိရသည်။  ယင်းဗလီတွင် IS ခေါင်းဆောင် အဘူဘာကာအယ်ဘဂ္ဂဒါဒီက ၂၀၁၄ ခုနှစ်တွင် သူ့ဘာသာ အစ္စလာမ္မစ် နိုင်ငံတော်၏ အကြီးအကဲအဖြစ် ကြေညာခဲ့ပြီး ယင်းကဲ့သို့ ကြေညာခဲ့စဉ်က တစ်ကြိမ်သာသူသည် လူရှေ့သူရှေ့၌ ထွက်ပြခဲ့ခြင်း ဖြစ်သည်။