International

တိုယိုတာက Mirai လောင်စာဆဲလ်ကား အားလုံးကို ဆော့ဖ်ဝဲချွတ်ယွင်းချက်ကြောင့် ပြန်လည်သိမ်းဆည်း

ဂျပန်ကားကုမ္ပဏီ တိုယိုတာက ကမ္ဘာအနှံ့သို့ ရောင်းချခဲ့သည့်  Mirai လောင်စာဆဲလ်ကား အားလုံးကို ဆော့ဖ်ဝဲချွတ်ယွင်းမှုကြောင့် ပြန်သိမ်းယူနေကြောင်း ဖေဖော်ဝါရီ ၁၅ ရက်ကထုတ်ပြန်ခဲ့သည်။ ထိုချွတ်ယွင်းမှုသည် ကား၏ဟိုက်ဒရိုဂျင် စွမ်းအင်စနစ်ကို ရပ်သွားစေနိုင်ကြောင်း သိရသည်။

တရုတ်တွင် H7 N9 ကြက်ငှက်တုပ်ကွေးကြောင့် သေဆုံးသူ မြင့်တက်လာနေပြီး မွေးမြူရေးလုပ်ငန်း အများအပြား ရပ်ဆိုင်းခဲ့ရ

တရုတ်သည် ကြက်ငှက်တုပ်ကွေး ဗိုင်းရပ်စ် H7 N9 ဖြစ်ပွားမှုကို အပြင်းထန်ဆုံး အခြေအနေနှင့် ကြုံတွေ့နေရပြီး ဇန်န၀ါရီ တစ်လတည်း၌ ၇၉ ဦး သေဆုံးခဲ့ကာ မွေးမြူ ရေးလုပ်ငန်း အများစုသည် ယင်းဗိုင်းရပ်စ်ကြောင့် ရပ်ဆိုင်းခဲ့ရသည်။ ကြက်ငှက်တုပ်ကွေး ရာသီတွင် သေဆုံးခဲ့သူဦးရေသည် ဇန်န၀ါရီလကုန်၌ ၁၀၀ အထိရှိခဲ့ကြောင်း အမျိုးသား ကျန်းမာရေးနှင့် မိသားစုစီမံကိန်း ကော်မရှင်က ဖေဖော်ဝါရီ ၁၆ ရက်တွင် ပြောကြားခဲ့သည်။

အိန္ဒိယက ဂြိုဟ်တု ၁၀၄ လုံး စံချိန်တင် သယ်ဆောင်သွားသော ဒုံးပျံကို အောင်မြင်စွာလွှတ်တင်

အိန္ဒိယသည် ဖေဖော်ဝါရီ ၁၅ ရက်က ဂြိုဟ်တု ၁၀၄ လုံးကို စံချိန်တင် သယ်ဆောင်သွားသော ဒုံးပျံတစ်စင်းအား အောင်မြင်စွာ လွှတ်တင်နိုင်ခဲ့သည်။ ယင်းဖြစ်စဉ်သည် အိန္ဒိယ၏ ကုန်ကျစရိတ် သက်သာသော အာကာသအေဂျင်စီအတွက် နောက်ဆုံးအောင်မြင်မှုကြီးတစ်ခု ဖြစ်လာခဲ့သည်။

အဆီတက်သော အစားအစာများကို အခွန်ကောက်ခြင်းဖြင့် ကျန်းမာရေး စောင့်ရှောက်စရိတ် ဘီလျံများစွာကို သက်သာစေနိုင်

ဆား၊ သကြားနှင့် အဆီဓာတ်ပါဝင်ပြီး ကျန်းမာရေးနှင့် မညီညွတ်သည့် အစားအစာများကို အခွန်ကောက်ခံခြင်းဖြင့် ကျန်းမာရေး စောင့်ရှောက်မှု စရိတ်အတွက် အသုံးပြုရမည့် ငွေဘီလျံပေါင်းများစွာကို သက်သာစေမည်ဟု သုတေသီများက ဖေဖော်ဝါရီ ၁၄ ရက်တွင် ပြောကြားခဲ့သည်။ ထို့ပြင် ယင်းသို့ အခွန်ကောက်ခံခြင်းကြောင့် လူထု၏ စားသောက်မှုပုံစံကို ပိုမိုကောင်းမွန်စေကာ လူ့သက်တမ်းများကို ပိုမိုရှည်စေနိုင်သည်ဟုလည်း ပြောကြားခဲ့သည်။

အမေရိကန်နှင့် ထိုင်းတို့၏ ၁၀ ရက်ကြာ Cobra Gold စစ်ရေးလေ့ကျင့်မှုကြီး စတင်

အမေရိကန်နှင့် ထိုင်းတို့၏ နှစ်စဉ် ပြုလုပ်နေကျ Cobra Gold ပူးတွဲစစ်ရေး လေ့ကျင့်မှုကြီးကို ဖေဖော်ဝါရီ ၁၄ ရက်က စတင်ခဲ့ကြောင်း သိရသည်။ သမ္မတသစ် ဒေါ်နယ်ထရန့် လက်ထက်၌ အာရှနှင့်ပတ်သက်သော အမေရိကန် နိုင်ငံခြားရေးမူဝါဒ၏ ဦးတည်ချက်ကို ရှင်းရှင်းလင်းလင်း မသိရသေးခင် ယခုပူးတွဲ စစ်ရေးလေ့ကျင့်မှုကို ကျင်းပခဲ့ခြင်းလည်း ဖြစ်သည်။