မြန်မာနိုင်ငံ၏ အခွန်ကောက်ခံမှု၊ ဘတ်ဂျက်ရေးဆွဲမှု၊ ကျောက်မျက်တူးဖော်ရေး၊ မူးယစ်ဆေးဝါးအန္တရာယ်လျှော့ချရေး ဆောင်ရွက်မှုများနှင့် ပတ်သက်၍ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်း.စုကြည်နှင့် သန်းကြွယ်သူဌေး ဂျော့ဆိုးရော့စ် ဆွေးနွေး

ဇန်န၀ါရီ ၁၁ ရက်က နေပြည်တော်ရှိ နိုင်ငံခြားရေးဝန်ကြီးဌာန ဧည့်ခန်းမ၌ နိုင်ငံတော်၏ အတိုင်ပင်ခံပုဂ္ဂ္ဂိုလ်၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည် Soros Fund Management ဥက္ကဋ္ဌ Mr.George Soros နှင့် အဖွဲ့အား လက်ခံတွေ့ဆုံစဉ်

(Photo:Myanmar State Counsellor Office Facebook)

မြန်မာနိုင်ငံ၏ အခွန်ကောက်ခံမှု၊ ဘတ်ဂျက်ရေးဆွဲမှု၊ ကျောက်မျက်တူးဖော်ရေး၊ မူးယစ်ဆေးဝါးအန္တရာယ် လျှော့ချရေးဆောင်ရွက်မှုများနှင့် ပတ်သက်၍ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် အမေရိကန် သန်းကြွယ်သူဌေး ဂျော့ဆိုးရော့စ်တို့ ဇန်န၀ါရီ ၁၁ ရက်က နေပြည်တော်တွင် ဆွေးနွေးခဲ့ကြောင်း နိုင်ငံခြားရေးဝန်ကြီးဌာန၏ သတင်းထုတ်ပြန်ချက်အရ သိရသည်။

နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်နှင့် Soros Management ဥက္ကဋ္ဌ အမေရိကန် သန်းကြွယ်သူဌေး ဂျော့ဆိုးရော့စ်နှင့်အဖွဲ့ နေပြည်တော်ရှိ နိုင်ငံခြားရေးဝန်ကြီးဌာန၌ တွေ့ဆုံစဉ် ဆွေးနွေး ခဲ့ခြင်းဖြစ်ကြောင်း ထုတ်ပြန်ချက်အရ သိရသည်။

ထိုသို့ တွေ့ဆုံရာတွင် မြန်မာနိုင်ငံ၏ အခွန်ကောက်ခံမှု၊ ဘတ်ဂျက်ရေးဆွဲမှုကဏ္ဍတို့နှင့် ပတ်သက်၍ လည်းကောင်း၊ ကျောက်မျက်တူးဖော်ရေးနှင့် ထုတ်လုပ်ရေးလုပ်ငန်းများ ဖွံ့ဖြိုးတိုးတက်ရေးအတွက် လည်းကောင်း၊ မူးယစ်ဆေးဝါး သုံးစွဲသူများအား ပြန်လည်ထူထောင်ရေးနှင့် မူးယစ်ဆေးဝါးအန္တရာယ် လျှော့ချရေးဆောင်ရွက်မှုများနှင့် ပတ်သက်၍ လည်းကောင်း၊ နည်းပညာအကူအညီများ ပံ့ပိုးပေးနိုင်မည့် ကိစ္စရပ်များအပေါ် အမြင်ချင်းဖလှယ် ဆွေးနွေးခဲ့သည်ဟု နိုင်ငံခြားရေးဝန်ကြီးဌာနက သတင်းထုတ်ပြန်သည်။

ကမ္ဘာ့အချမ်းသာဆုံးလူပုဂ္ဂိုလ် ၃၀ တွင် တစ်ဦးအပါအ၀င် ဖြစ်သည့်  Open Society Foundation ၏ ဥက္ကဋ္ဌဖြစ်သူ မစ္စတာဂျော့ဆိုးရော့စ်သည် မြန်မာနိုင်ငံကို မကြာခဏ လာရောက်လေ့ရှိသူ တစ်ဦးဖြစ်သည်။

ထို့ပြင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ၂၀၁၆ ခုနှစ် စက်တင်ဘာလအတွင်း အမေရိကန်ခရီးစဉ်အတွင်းကလည်း မစ္စတာဂျော့ဆိုးရော့စ်နှင့် တွေ့ဆုံဆွေးနွေးမှုများ ပြုလုပ်ခဲ့သည်။

သန်းကြွယ်သူဌေး မစ္စတာဂျော့ဆိုးရော့စ်သည် ပရဟိတလုပ်ငန်းများစွာတွင် လှူဒါန်းမှုများစွာ ပြုလုပ်ထားသူတစ်ဦးဖြစ်ပြီး ၁၉၇၉ ခုနှစ်မှ ၂၀၁၁ ခုနှစ်အတွင်း ပရဟိတလုပ်ငန်းများအတွက် အမေရိကန်ဒေါ်လာ ၁၁ ဘီလျံကျော် လှူဒါန်းခဲ့သည်ဟု သိရသည်။

 

Writer: 
ငြိမ်းဇော်လင်း