ကြားဖြတ်ရွေးကောက်ပွဲ ၀င်ပြိုင်မည့် လွှတ်တော်ကိုယ်စားလှယ်လောင်းများ ဇန်န၀ါရီ ၃၀ ရက်မှစ၍ ရက်ပေါင်း ၆၀ မဲဆွယ် စည်းရုံးနိုင်ကြောင်း ပြည်ထောင်စုရွေးကောက်ပွဲကော်မရှင် ကြေညာ

ကြားဖြတ်ရွေးကောက်ပွဲ ၀င်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းများသည် ၂၀၁၇ ခုနှစ် ဇန်န၀ါရီ ၃၀ ရက်မှ စတင်ကာ ရက်ပေါင်း ၆၀ ရွေးကောက်ပွဲဆိုင်ရာ စုဝေးဟောပြောခြင်း၊ မဲဆွယ်စည်းရုံးခြင်းတို့ ဆောင်ရွက်နိုင်ကြောင်း ပြည်ထောင်စု ရွေးကောက်ပွဲကော်မရှင်က ဇန်န၀ါရီ ၁၁ ရက်တွင် ကြေညာချက်အမှတ် (၁/၂၀၁၇) ကို ထုတ်ပြန်သည်။

အဆိုပါ ထုတ်ပြန်ချက်တွင် ၂၀၁၇ ခုနှစ် ဧပြီ ၁ ရက်တွင် ပြုလုပ်မည့် ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်ကြမည့် လွှတ်တော် ကိုယ်စားလှယ်လောင်းများသည် ကြားဖြတ်ရွေးကောက်ပွဲ တည်ငြိမ်အေးချမ်းပြီး အောင်မြင်စေရေးအတွက် မဲဆွယ်စည်းရုံးမှုများ ပြုလုပ်ရာတွင် နိုင်ငံရေးပါတီများနှင့် ကိုယ်စားလှယ်များအတွက် ကျင့်ဝတ် (Code of conduct for political parties and candidates) ကို လေးစားလိုက်နာ ဆောင်ရွက်ကြမည် ဖြစ်ကြောင်း ၂၀၁၇ ခုနှစ် ဇန်န၀ါရီ ၃ ရက်တွင် ပြည်ထောင်စုရွေးကောက်ပွဲကော်မရှင်ရုံး၌ ပြုလုပ်သည့် ညှိနှိုင်းအစည်းအဝေးပွဲတွင် နိုင်ငံရေးပါတီများနှင့် တစ်သီးပုဂ္ဂလ ကိုယ်စားလှယ်လောင်းများက သဘောတူ ဆုံးဖြတ်ခဲ့ပြီးဖြစ်ကြောင်း၊ ပြည်ထောင်စု ရွေးကောက်ပွဲကော်မရှင်သည် ကြားဖြတ်ရွေးကောက်ပွဲအတွက် မဲဆွယ်စည်းရုံးခွင့်ကာလကို ၂၀၁၇ ခုနှစ် ဇန်န၀ါရီ ၃၀ ရက် နံနက် ၆ နာရီမှ ၂၀၁၇ ခုနှစ် မတ် ၃၀ ရက် ည ၁၂ နာရီအထိ ရက်ပေါင်း ၆၀ ခွင့်ပြုကြောင်း ဖော်ပြထားသည်။

ထို့ပြင် လွှတ်တော် ကိုယ်စားလှယ်လောင်းများသည် ၂၀၁၇ ခုနှစ် မတ် ၃၀ ရက် ည ၁၂ နာရီအချိန်မှ ဧပြီ ၁ ရက် ကြားဖြတ်ရွေးကောက်ပွဲ ကျင်းပပြီးသည်အထိ ရွေးကောက်ပွဲဆိုင်ရာ စုဝေးဟောပြောခြင်းနှင့် မဲဆွယ်စည်းရုံးခြင်းတို့ကို ရပ်နားရမည်ဖြစ်ကြောင်း ကြေညာချက်တွင် ပြည်ထောင်စုရွေးကောက်ပွဲကော်မရှင်က သတိပေးထားသည်။

ထို့အတူ လွှတ်တော်ကိုယ်စားလှယ်လောင်းများသည် မဲဆွယ်စည်းရုံးသည့် ကြော်ငြာ ပိုစတာများကို မဲဆွယ်စည်းရုံးခွင့် ပြုထားသည့် နောက်ဆုံးရက် မတ် ၃၀ ရက် ည ၁၂ နာရီ နောက်ဆုံးထားပြီး ဖြုတ်သိမ်းပေးရမည် ဖြစ်ကြောင်း၊ သတ်မှတ်ချိန်အထိ မဲဆွယ်စည်းရုံးသည့် ကြော်ငြာပိုစတာများ ဖြုတ်သိမ်းထားခြင်း မရှိပါက မြို့နယ်ရွေးကောက်ပွဲကော်မရှင် အဖွဲ့ခွဲများသည် သက်ဆိုင်ရာ စည်ပင်သာယာရေးကော်မတီများနှင့် ညှိနှိုင်းပြီး ကြော်ငြာပိုစတာများအား ဖြုတ်သိမ်းသွားစေမည်ဖြစ်ကာ ကုန်ကျစရိတ် ကျသင့်ငွေအား သက်ဆိုင်ရာ ကိုယ်စားလှယ်လောင်းမှ ပေးချေရန် တာဝန်ရှိမည်ဖြစ်ကြောင်း  ကြေညာချက်တွင် ပါရှိသည်။

ကြားဖြတ်ရွေးကောက်ပွဲတွင် လစ်လပ်မဲဆန္ဒနယ် ပြည်သူ့လွှတ်တော်တွင် ကိုးနေရာ၊ အမျိုးသားလွှတ်တော်တွင် သုံးနေရာ၊ ပြည်နယ်လွှတ်တော်တွင် ခုနစ်နေရာ စုစုပေါင်း ၁၉ နေရာဖြစ်ပြီး တစ်သီးပုဂ္ဂလ ကိုယ်စားလှယ်လောင်း ခုနစ်ဦး အပါအ၀င် နိုင်ငံရေးပါတီ ၂၄ ပါတီမှ လွှတ်တော်ကိုယ်စားလှယ်လောင်း ၉၅ ဦး ၀င်ရောက်ယှဉ်ပြိုင်မည် ဖြစ်သည်။