အစိုးရနှင့် ဆွေးနွေးရန် ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီ ဖွဲ့စည်းပြီး တစ်ဖွဲ့ချင်း ဆွေးနွေးခြင်း မပြုဘဲ ကော်မတီ အမည်ဖြင့်သာ ဆောင်ရွက်မည်ဟု ‘၀’ အဖွဲ့ဦးဆောင်သော ပန်ခမ်းအစည်းအဝေး ထုတ်ပြန်

တိုင်းရင်းသားလက်နက်ကိုင်အဖွဲ့ ခုနှစ်ဖွဲ့၏ စတုတ္ထအကြိမ် ပန်ခမ်းအစည်းအဝေးကို တွေ့ရစဉ် (ဓာတ်ပုံ-UWSP)

နိုင်ငံတော်အစိုးရနှင့် ဆွေးနွေးရန် ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီ ဖွဲ့စည်းလိုက်ကြောင်းနှင့် တစ်ဖွဲ့ချင်း ဆွေးနွေးခြင်း မပြုဘဲ ကော်မတီ အမည်ဖြင့်သာ ဆောင်ရွက်သွားမည်ဟု ‘၀’ လက်နက်ကိုင်အဖွဲ့ ဦးဆောင်ပြုလုပ်သော တိုင်းရင်းသား လက်နက်ကိုင်အဖွဲ့ ခုနစ်ဖွဲ့၏ စတုတ္ထအကြိမ် ပန်ခမ်းအစည်းအဝေးက ဧပြီ ၁၉ ရက်တွင် ကြေညာချက်ထုတ်ပြန်သည်။

အဆိုပါ အစည်းအဝေးကို ‘၀’ သွေးစည်းညီညွတ်ရေးပါတီ (UWSP/UWSA) မှ ကမကထပြု ကျင်းပခြင်းဖြစ်ပြီး ‘၀’ ကိုယ်ပိုင် အုပ်ချုပ်ခွင့်ရတိုင်း ပန်ခမ်းမြို့၌ ဧပြီ ၁၅ ရက်မှ ဧပြီ ၁၉ ရက်အထိ ပြုလုပ်ခဲ့ခြင်းဖြစ်ပြီး ထိုသို့ ထုတ်ပြန်ခဲ့ခြင်းဖြစ်သည်။

ယင်းထုတ်ပြန်ချက်တွင် တိုင်းရင်းသားလက်နက်ကိုင် အဖွဲ့အစည်း ခေါင်းဆောင်များ စတုတ္ထအကြိမ် မျက်နှာစုံညီ အစည်းအဝေးတွင် ပြည်ထောင်စုသမ္မတ မြန်မာနိုင်ငံတော် အစိုးရနှင့် တွေ့ဆုံဆွေးနွေးမည့် နိုင်ငံရေးဆွေးနွေးရေး ကော်မတီကို ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီအဖြစ် သတ်မှတ်လိုက်ကြောင်းနှင့် အဆိုပါကော်မတီနှင့် ၎င်းအောက်တွင် ထားရှိမည့် အတွင်းရေးမှူးအဖွဲ့နှင့် ဆွေးနွေးရေးကိုယ်စားလှယ်အဖွဲ့၏ ဖွဲ့စည်းမှု အမည်စာရင်းများကို အတည်ပြုလိုက်ကြောင်းနှင့် ကော်မတီ၏ စည်းမျဉ်းဥပဒေကို အတည်ပြုလိုက်ကြောင်း ဖော်ပြထားသည်။

ထို့ပြင် နိုင်ငံရေးဆွေးနွေးမှုအပေါ် တိုင်းရင်းသား လက်နက်ကိုင် အဖွဲ့အစည်းများ၏ အထွေထွေမူဝါဒနှင့် ရပ်တည်ချက်ကို အတည်ပြုပြီး ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီမှ ပြည်ထောင်စုသမ္မတ မြန်မာနိုင်ငံတော်နှင့် ဆွေးနွေးညှိနှိုင်းမည့် ဘုံစာတမ်းအဖြစ် အတည်ပြုလိုက်ကြောင်းလည်း ဖော်ပြထားသည်။

ထို့အတူ ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီ၏ အဖွဲ့အစည်းများသည် နောင်တွင် ပြည်ထောင်စုသမ္မတမြန်မာနိုင်ငံတော် အစိုးရနှင့် ဆွေးနွေးသည့်အခါ တစ်ဖွဲ့ချင်း ဆွေးနွေးခြင်း မပြုဘဲ ၎င်းကော်မတီ အမည်ဖြင့်သာ တစ်ညီတစ်ညွတ်တည်း ဆောင်ရွက်သွားမည်ဟု ကြေညာချက်တွင် ထည့်သွင်း ထုတ်ပြန်ခဲ့သည်။

စတုတ္ထအကြိမ် ပန်ခမ်းအစည်းအဝေးသို့ ရခိုင်လက်နက်ကိုင်အဖွဲ့ (AA)၊ ကချင်လက်နက်ကိုင်အဖွဲ့ (KIA)၊ ကိုးကန့်လက်နက်ကိုင်အဖွဲ့ (MNDAA)၊ တအာန်းလက်နက်ကိုင်အဖွဲ့ (TNLA)၊ ရှမ်းပြည်တိုးတက်ရေးပါတီ (SSPP/SSA)၊ မိုင်းလားအဖွဲ့ (NDAA) နှင့် ‘၀’ လက်နက်ကိုင်အဖွဲ့ (UWSA) စသည့် အဖွဲ့ခုနစ်ဖွဲ့မှ ကိုယ်စားလှယ် ၂၇ ဦး တက်ရောက်ခဲ့ကြောင်း ထုတ်ပြန်ချက်အရ သိရသည်။

အဆိုပါ အစည်းအဝေးသို့ တက်ရောက်သည့် အဖွဲ့အစည်း ခုနစ်ဖွဲ့သည် ပြည်ထောင်စု နိုင်ငံရေး ဆွေးနွေးညှိနှိုင်းရေး ကော်မတီအား စတင်တည်ထောင်သည့် အဖွဲ့အစည်းများဖြစ်ကြပြီး တတိယအကြိမ် ပန်ခမ်းအစည်အးဝေး ထုတ်ပြန်ကြေညာချက်၊ ၎င်းကော်မတီ၏ စည်းမျဉ်းစည်းကမ်းနှင့် နိုင်ငံရေးဆွေးနွေးမှုအပေါ် တိုင်းရင်းသားလက်နက်ကိုင် အဖွဲ့အစည်းများ၏ အထွေထွေ မူဝါဒနှင့် ရပ်တည်ချက်များကို လက်ခံသည့် အခြားတိုင်းရင်းသား လက်နက်ကိုင် အဖွဲ့အစည်း၊ တိုင်းရင်းသားနိုင်ငံရေး ပါတီနှင့် သြဇာရှိပုဂ္ဂိုလ်များအတွက် တံခါးဖွင့်ထားကြောင်း၊ လက်ရှိငြိမ်းချမ်းရေး လုပ်ငန်းစဉ် ကြုံတွေ့နေရသည့် အခက်အခဲမှ မည်သို့ထိုးဖောက်နိုင်ရန် ‘၀’ အဖွဲ့မှ အစည်းအဝေးသို့ စာတမ်းတင်သွင်း၍ ဆွေးနွေးညှိနှိုင်းပြီး အတည်ပြုခဲ့ကြောင်းနှင့် အဆိုပါစာတမ်းအား ပြည်ထောင်စုသမ္မတ မြန်မာနိုင်ငံတော် အစိုးရထံ ပေးပို့သွားမည်ဖြစ်ကြောင်း ထုတ်ပြန်ချက်အရ သိရသည်။

Writer: 
ငြိမ်းဇော်လင်း