လွှတ်တော်သည် ဆောင်ပုဒ်၊ ကဗျာ၊ လေးလုံးစပ်၊ ဒွေးချိုးပြိုင်သည့်နေရာ မဟုတ်aကြာင်း ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောကြားသည်။

လွှတ်တော်ကိုယ်စားလှယ်များ အနေဖြင့် လွှတ်တော်တွင် ကိုယ့်ဆွေးနွေးချက်များကို ကိုယ်တာဝန်ခံရမည် ဖြစ်ကြောင်းနှင့် ပြီးစလွယ် မပြောစေချင်ကြောင်း ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောကြားသည်။

လွှတ်တော်ဥက္ကဋ္ဌ ဦးဝင်းမြင့်က နေပြည်တော်တွင် သြဂုတ် ၁၈ ရက်က ကျင်းပသည့် ပြည်သူ့လွှတ်တော် အစည်းအဝေး၌ မေးခွန်းမေးမြန်းခြင်း အစီအစဉ် အပြီးတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

လွှတ်တော်ကိုယ်စားလှယ် အားလုံးသည်လည်း လွှတ်တော်ဆိုင်ရာဥပဒေ၊ နည်းဥပဒေအတိုင်း ကျင့်သုံးရမည်ဖြစ်ကြောင်း၊ ဥပဒေ၊ နည်းဥပဒေကို ကျော်လွန်ပြီး ကျင့်သုံး၍ မရကြောင်း၊ ဥက္ကဋ္ဌ အနေဖြင့်လည်း ဥပဒေ၊ နည်းဥပဒေကို ကျော်လွန်ပြီး ကျင့်သုံး၍ မရကြောင်း ဦးဝင်းမြင့်က ပြောကြားသည်။

“ဒါကြောင့်မို့လို့ လွှတ်တော်မှာ ဆွေးနွေးတဲ့ အခါမှာ ဆောင်ပုဒ်တို့၊ ကဗျာတို့၊ လေးလုံးစပ်တို့၊ ဒွေးချိုးတို့၊ လေးချိုးတို့ ဒါတွေ တော်တော်များများ သတိထားကြပါ။ ဒါက ဒီနေရာက လွှတ်တော်ဖြစ်ပါတယ်။ အဲဒီတော့ လိုအပ်တာထက် ပိုလာရင် အပွင့်လင်းဆုံး ပြောပါမယ်။ ကျွန်တော်ကိုယ်တိုင်ပင်လျှင်လည်း မနှစ်သက်ပါဘူး။ အခုနလည်း တစ်ခုတွေ့လိုက်တယ်။ ဟိုတုန်းကလည်း ကိုယ်စားလှယ်တွေ ဆွေးနွေးတာရှိတယ်။ ကျွန်တော် ပြန်မကောက်တော့ဘူး။ ကျွန်တော် ပြောပြီးပြီ။ ဒီနေရာဟာ ဆောင်ပုဒ်ပြိုင်တဲ့နေရာ မဟုတ်ဘူး။ ကဗျာပြိုင်တဲ့နေရာ မဟုတ်ဘူး။ လေးလုံးစပ်ပြိုင်တဲ့နေရာ မဟုတ်ဘူး။ ဒွေးချိုးပြိုင်တဲ့နေရာ မဟုတ်ဘူး။ ဆွေးနွေးစရာ ရှိတာကို ပွင့်ပွင့်လင်းလင်းနဲ့ ရှင်းရှင်းလင်းလင်း ဆွေးနွေး၊ အဲတစ်ခု အသိပေးထားမယ်။ ကိုယ်စားလှယ်များအား လွှတ်တော်မှာ ဆွေးနွေးချက်များသည် နည်းဥပဒေ ပြန်ကြည့်ပါ မှန်ကန်ကြောင်း အထောက်အထားရှိကြောင်း ကိုယ်စားလှယ်တွေ အားလုံး တာဝန်ယူရတယ်။ အဲဒါပြန်ကြည့်။ အဲဒါကို သတိမပြတ်နဲ့။ ကျွန်တော် စာအုပ်လှန်ပြီး မဖတ်ပြတော့ဘူး။ လွှတ်တော်မှာ ဆွေးနွေးချက်များ အားလုံးဟာ ကိုယ်စားလှယ်တွေအားလုံး ကိုယ်ဆွေးနွေးတာကို ကိုယ်တာဝန်ခံရမယ်။ ကိုယ့်မှာ ခိုင်ခိုင်လုံလုံ ရှိရမယ်။ အဲဒါလေးတော့ သတိပြုစေချင်ပါတယ်။ ပြီးလွယ်စီးလွယ်စကားကို မပြောစေချင်ပါဘူး” ဟု ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောကြားသည်။

ထို့ပြင် ပြည်သူ့လွှတ်တော်ဥက္ကဋ္ဌ ဦးဝင်းမြင့်က ကောလင်းမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးမျိုးဇော်အောင်၏ မေးခွန်းမေးမြန်းမှု အပြီးတွင်လည်း “ကျွန်တော်တို့ ကိုယ်စားလှယ်တွေ ဆွေးနွေးတဲ့အခါမှာ ကိုယ်စားလှယ်တွေရဲ့ လုပ်ပိုင်ခွင့်၊ တာဝန်၊ ရပိုင်ခွင့်အရ ဆွေးနွေးခွင့်လည်း ပေးထားပါတယ်။ ကျွန်တော်တို့ ကိုယ်စားလှယ်တွေ အားလုံး နားလည်သဘောပေါက်ဖို့ပါ။ ဆွေးနွေးတာနဲ့ Story ပြောတာ မတူဘူး။ ဆွေးနွေးစရာ ရှိတာကို ဆွေးနွေးလိုက်ပါ။ လွှတ်တော်ထဲမှာ Story ပြောရမှာ မဟုတ်ဘူး။ အဲဒါကို ကျွန်တော်တို့ သတိပြုသင့်တယ်။ လွှတ်တော်က Story ပြောတဲ့နေရာ မဟုတ်ဘူး။ ဆွေးနွေးစရာ ရှိတာတော့ ဆွေးနွေးလိုက် ဘာပြောချင်လဲ၊ ဘာဆွေးနွေချင်လဲ၊ ဆွေးနွေးလိုက်။ ဒါလေးတို့ ဂရုစိုက်စေချင်တယ်” ဟု ပြောကြားသည်။